A Obra Social ABANCA lanza a cuarta edición de Segura-Mente, o programa de educación financeira gañador do premio 'Finanzas para todos'
Afundación Obra Social ABANCA lanza a cuarta edición do seu programa de educación financeira Segura-Mente para o curso 2021-22, unha experiencia inmersiva que foi galardoada polo Banco de España e a Comisión Nacional do Mercado de Valores (CNMV) co premio ‘Finanzas para todos’ na categoría de ‘mellor iniciativa de educación financeira’.
Con máis de 190.000 participantes en edicións anteriores, este programa educativo ten como obxectivo achegar aos estudantes de segundo e terceiro ciclo de Primaria, Secundaria e FP Básica a educación financeira aplicada á vida real mediante un xogo ameno e divertido no que aprenderán percorrendo de forma virtual o Camiño de Santiago.
Así, Segura-Mente fomenta neles a cultura da prevención baseada na asunción de riscos, a toma de decisións e a aceptación de responsabilidades mediante un recurso baseado na gamificación co que o alumnado, ademais de adquirir unha aprendizaxe significativa sobre finanzas, poderá reforzar os seus coñecementos de historia, arte, literatura e mesmo os Obxectivos de Desenvolvemento Sostible.
Os premios para os participantes tamén se incrementan nesta cuarta edición, xa que ademais do gran premio final para os gañadores nacionais, as aulas participantes poderán gañar cada mes un premio de 200 euros en experiencias para a aula.
O proxecto, que foi avalado polas Consellerías de Educación da Xunta de Galicia, a Comunidade de Madrid ou de Castela e León, forma parte do programa de acción educativa que impulsan ABANCA e a súa Obra Social, Afundación, cuxo obxectivo é achegar aos estudantes das aulas de todo o territorio español as ferramentas necesarias para ser adultos responsables e conscientes do futuro.
A educación financeira vese reforzada, ademais de por Segura-Mente, por A Tola Aventura do Aforro, unha ferramenta didáctica baseada na gamificación para nenos e nenas de 1º a 6º de Primaria.