ABANCA participa no Día Solidario das Empresas con actividades na Coruña, Vigo e Madrid
- Os voluntarios de ABANCA ofrecerán almorzos a persoas sen fogar, axudarán a rehabilitar espazos e realizarán talleres de lecer con discapacitados
- O Día Solidario das Empresas é unha iniciativa de Cooperación Internacional ONG e ATRESMEDIA que este ano reunirá a un milleiro de voluntarios de 45 empresas
Imaxe de arquivo dunha das actividades de voluntariado organizadas polo banco.
ABANCA participará no Día Solidario das Empresas que se celebra este sábado 21 de outubro con diferentes actividades benéficas organizadas na Coruña, Vigo e Madrid. En total, 34 voluntarios do banco súmanse a esta iniciativa promovida por Cooperación Internacional ONG e ATRESMEDIA que se desenvolverá de maneira simultánea en 13 cidades españolas e que ten como última finalidade sensibilizar e implicar ás empresas no cambio social.
Na cidade herculina, os empregados e empregadas de ABANCA realizarán unha acción de acompañamento a persoas sen fogar que consistirá en ofrecer almorzos solidarios polas rúas baixo a coordinación de Cooperación Internacional ONG.
Os voluntarios da comarca de Vigo reuniranse en Redondela para realizar labores de rehabilitación dalgúns espazos actualmente en desuso nas instalacións que ten nesta localidade a ONG Aldeas Infantiles. En concreto, darase unha man de pintura a unhas construcións nas que hai anos tendíase a roupa e que agora poderán utilizarse con outra finalidade.
Por último, en Madrid, a actividade na que participará o persoal de ABANCA permitirá que nenos e nenas con discapacidade intelectual da Asociación AMPNEE poidan gozar dunha mañá de diversión e xogos nun escenario cheo de neve no espazo Madrid SnowZone Xanadú.
Para concluír a xornada solidaria en cada unha das cidades os empregados e empregadas de ABANCA terán ocasión de intercambiar experiencias con voluntarios doutras empresas participantes e representantes das entidades benéficas colaboradoras durante unha comida de confraternización.
O Día Solidario das Empresas é un proxecto de Cooperación Internacional ONG e ATRESMEDIA que ten o obxectivo de promover e facilitar a participación social das empresas a través do voluntariado corporativo. Este ano celébrase a undécima edición do evento e está previsto que participen nas diferentes actividades organizadas un milleiro de voluntarios de 45 empresas.