ABANCA apoia os rañeiros de Vilanova e ofrece crédito para compensar o efecto do paro biolóxico

  • A entidade financeira e a Confraría A Pastoriza da localidade pontevedresa asinan un convenio que inclúe unha póliza de crédito que adianta o cobro das subvencións
  • Este acordo únese a outros en vigor rubricados con asociacións do sector marítimo afectadas en Arousa

ABANCA e a Confraría A Pastoriza de Vilanova de Arousa veñen de asinar un novo convenio que dá resposta inmediata á situación de asfixia que vive o sector na localidade. Trátase dun acordo estratéxico que responde ás demandas recibidas pola entidade financeira dende o sector no Salnés. A presidenta da Confraría A Pastoriza de Vilanova, María José Vilas Martínez, e o director de zona de ABANCA no Salnés, Victor Manuel Vázquez Saavedra, rubricaron hoxe un acordo que evidencia o apoio do banco con sede en Galicia á economía de proximidade, ao sector primario galego e ás actividades estratéxicas autonómicas.

Este texto conxunto permite aos traballadores dos bancos de libre marisqueo de Vilanova contrarrestar o efecto do paro por razóns biolóxicas na zona, que aínda está previsto que se prolongue algunhas semanas. A entidade financeira habilita dende este momento unha póliza de crédito específica con intereses moi baixos e sen comisións pensada para facer fronte á falta de ingresos. Os rañeiros poderán cancelar o produto no momento que perciban as subvencións ou prestacións.

Os máis de 400 confrades afectados polo cese de actividade na ría e a propia Confraría A Pastoriza tamén terán á súa disposición toda a oferta específica de ABANCA para o sector pesqueiro. Entre outros, inclúe préstamos persoais sen xuros ou comisións para aprazar pago de impostos, préstamos hipotecarios, leasing mobiliario, avais ou liñas de desconto. Tamén optan ao Plan Activamos asinado coa Deputación de Pontevedra ou aos programas oficiais de crédito co Igape ou o ICO.

Este apoio da entidade financeira xa conta con precedentes en Arousa. O pasado ano ABANCA reforzou o seu apoio a este sector clave na economía do Salnés despois de asinar convenios coas confrarías da Illa, Cambados, Carril e Vilaxoán.