ABANCA estrea o seu modelo de oficina en Valencia cun novo espazo na praza do Concello
- A entidade financeira incorpora ao seu centro de referencia na cidade os últimos avances despregados para ofrecer un servizo máis especializado aos seus clientes
- Conta con xestores especializados que traballan á medida das necesidades de particulares, autónomos, pemes, grandes empresas e institucións
- A nova oficina reforza a presenza do banco na Comunitat Valenciana, onde xa conta con catro oficinas para particulares e tres para empresas
Novos espazos da oficina Valencia-Praza Concello.
Novos espazos da oficina Valencia-Praza Concello.
Novos espazos da oficina Valencia-Praza Concello.
ABANCA desprega en Valencia por primeira vez o seu novo modelo de oficina, máis tecnolóxica e especializada, tras completar nos últimos días as obras de reforma dun inmoble emprazado na praza do Concello da capital. O novo espazo conta con dous andares que suman case 650 metros cadrados destinados á atención ao público.
Esta transformación integral do espazo segue o novo modelo de oficina que ABANCA está implantando nos seus centros máis singulares. Trátase dunha concepción vangardista onde o cliente é o protagonista e cuxo obxectivo é mellorar a atención, implantar as solucións tecnolóxicas máis innovadoras do mercado e ofrecer maiores prestacións a empregados.
Un dos aspectos máis rechamantes do novo centro, emprazado nun lugar privilexiado de Valencia, é que aposta por potenciar a transparencia e é por iso que elimina os despachos. No seu lugar, a nova oficina conta con cinco salas de reunións adaptadas ás necesidades dos clientes. A vocación comercial está reflectida en sete espazos de atención para clientes nos que os empregados dan resposta en mobilidade con dispositivos Surface. As instalacións do novo espazo complétanse con 33 postos de xestión para as operacións non presenciais e dos postos para atender as operacións máis transaccionais e o efectivo.
Un impulso á especialización da atención
O estreo da oficina máis emblemática de ABANCA en Valencia é tamén a posta en escena da aposta da entidade financeira pola especialización e as respostas adaptadas a cada segmento. As novas instalacións albergan a oficina de particulares, pero tamén o Centro de Empresas de Valencia, así como xestores especializados en banca institucional ou banca corporativa.
A transformación integral foi aproveitada tamén para gañar en axilidade á hora de realizar as operacións máis habituais. As novas instalacións estrean un caixeiro de última xeración que permite, ademais de retiradas, realizar ingresos en firme, pagos de recibos en efectivo e outras operativas con moedas.
A estratexia de dixitalización do banco complétase nesta oficina habilitando outros espazos para que os clientes realicen de maneira autónoma as súas operacións máis habituais. As instalacións incorporan unha rede WIFI gratuíta.
A entidade financeira mantén na Comunitat Valenciana catro oficinas en Castellón, Valencia e Alicante. Esta oferta complétase con tres espazos para empresas, un en cada unha das capitais de provincia.