ABANCA fixa como prioridades para 2017 gañar clientes e consolidar a súa transformación comercial e dixital

03-02-2017

A captación de novos clientes e o incremento da actividade con pemes, micropemes, comercios e autónomos serán obxectivos prioritarios de ABANCA en 2017, ano no que o banco culmina o seu primeiro Plan Estratéxico.

Os principais directivos de ABANCA expuxeron hoxe as grandes liñas de actuación e obxectivos establecidos para este ano na convención anual do banco, que congregou na Coruña a máis dun milleiro de empregados da división comercial e as distintas áreas de apoio ao negocio. No encontro participaron o presidente da entidade, Javier Etcheverría de la Muela; o vicepresidente, Juan Carlos Escotet Rodríguez e o conselleiro delegado, Francisco Botas Ratera, que estiveron acompañados polo resto do comité de dirección e do consello de administración. Así mesmo, asistiron á reunión os directores de oficina e directivos da entidade.

Durante a convención, os directivos recalcaron que o crecemento da base de clientes e o aumento da vinculación e fidelización serán, xunto co foco na actividade ‘micro’, claves para alcanzar os obxectivos de negocio e de rendibilidade fixados para este ano. A entidade priorizará a actividade con pemes, micropemes, comercios e autónomos e a concesión de crédito a estes colectivos, especialmente, a través do financiamento de circulante. Ademáis, o banco potenciará a captación de clientes e o negocio con outros segmentos de valor, como a banca persoal e privada.

ABANCA ten previsto consolidar durante este ano o novo modelo de especialización por segmentos de clientes iniciado en 2016, que constitúe un dos piares da transformación comercial que está acometendo a entidade. “Imos consolidar a especialización da nosa estrutura comercial para ofrecer aos nosos clientes unha xestión máis personalizada, que poida satisfacer as súas demandas e garantir o seu benestar financeiro, co obxectivo de mellorar a súa experiencia e lograr que nos posicionen como a súa entidade de referencia”, apuntou Francisco Botas durante a convención.

Último ano do Plan Estratéxico

Pola súa parte, o vicepresidente, Juan Carlos Escotet Rodríguez, desvelou que a entidade xa cumpriu, a día de hoxe, a gran maioría dos obxectivos establecidos no Plan Estratéxico 2015-2017. “Melloramos notablemente o noso perfil financeiro, logramos un crecemento e rendibilidade superiores ao mercado e asentamos unha posición de solvencia que nos sitúa de maneira recorrente entre as entidades máis sólidas. Estes logros conseguímolos cunha estratexia na que priman, ademáis da rendibilidade, a sostenibilidade, o control do risco e a orientación ao cliente”, indicou.

No último ano de vixencia do Plan Estratégico, ABANCA seguirá priorizando a mellora da eficiencia e reforzará a súa aposta polas liñas de negocio de financiamento ao consumo, medios de pago, seguros e a actividade de fóra de balance (fondos de investimento e plans de pensións). A entidade consolidará durante este ano o desenvolvemento da súa nova unidade ABANCA Consumer Finance, coa que pretende mellorar o seu posicionamiento no mercado de consumo, ao tempo que aspira a gañar cuota de mercado nos negocios de tarxetas e fondos de investimento.

Dixitalización

ABANCA dará durante 2017 un novo impulso á súa estratexia de dixitalización coa posta en marcha de novos proxectos de tecnoloxía e innovación financeira enfocados a mellorar a experiencia do cliente coa entidade e reducir a carga administrativa en oficinas. Entre outras iniciativas, o banco ten previsto o lanzamento de novos servizos e canles de comunicación cos clientes dixitais e a potenciación da contratación online.