ABANCA pecha a primeira emisión de bonos AT1 de 2021 con sobredemanda e a un tipo de xuro moi reducido

  • A emisión alcanza os 375 millóns e contou con peticións por máis de 2.100 millóns de euros, cantidade que multiplica por 5,7 a oferta
  • A emisión será remunerada a un 6%, un dos menores xuros do mercado
  • Con esta emisión ABANCA, unha das entidades máis solventes do mercado español, amplía e diversifica o seu capital segundo o previsto no seu plan estratéxico e anticipa o cumprimento dos requisitos do regulador (MREL) para este tipo de capital
20210107-abanca-emision-at1

ABANCA é unha das entidades españolas mellor capitalizadas.

Descarga en alta resolución

ABANCA pechou hoxe os termos económicos para a primeira emisión de bonos AT1 do ano por importe de 375 millóns de euros. A emisión espertou gran interese no mercado, xerando unha demanda de máis de 2.100 millóns de euros, cantidade que supón 5,7 veces o importe da emisión, e foi colocada na súa totalidade en tres horas aproximadamente, entre investidores institucionais principalmente europeos.

A pesar do difícil contexto económico no que se realizou, a remuneración fixouse nun 6%, un tipo de xuro 150 puntos básicos inferior ao rexistrado na anterior emisión deste tipo de débeda realizada por ABANCA, feito que reflicte a favorable percepción do mercado sobre a positiva evolución da entidade nos últimos exercicios.

ABANCA, unha das entidades españolas mellor capitalizadas, cumpre con esta emisión co obxectivo de ampliar e diversificar o seu capital. Os títulos emitidos teñen a categoría de Capital Adicional de Nivel 1 (AT1 en inglés). Adicionalmente, a emisión permite a ABANCA cubrir todo o colchón de débeda deste tipo solicitado polos reguladores e seguir avanzando no cumprimento da nova normativa europea de requirimento mínimo de fondos propios e pasivos admisibles (MREL polas súas siglas en inglés). Tras esta colocación, ABANCA diversifica o seu capital segundo o previsto no seu plan estratéxico e fortalece o seu cociente de capital -situado en 16.4 % en setembro de 2020- en máis de 120 puntos básicos, ata alcanzar o 17,6%.