ABANCA permite facerse cliente desde o móbil a través dunha videochamada

14-11-2017

ABANCA vén de incorporar á súa aplicación de banca móbil a posibilidade de facerse cliente da entidade a través dunha videochamada. O procedemento é moi rápido e sinxelo, en menos de 10 minutos calquera usuario poderá contratar o produto ‘Conta Clara’ e empezar a operar como cliente de ABANCA.

“O usuario só necesita descargarse a nosa app de banca móbil no seu teléfono, seguir uns sinxelos pasos e nuns minutos xa é cliente de ABANCA e terá o seu ‘Conta Clara’ contratada”, explica Javier Diaz, xerente de ABANCA Dixital.

A ‘Conta Clara’ é un produto dixital que permite ter unha conta corrente e unha conta a prazo conectadas entre si para aforrar de forma automática. Non ten comisións e as tarxetas de débito, de crédito e as transferencias son gratis, sempre que opere en canles dixitais.

Coa posta en marcha desta iniciativa ABANCA sitúase á vangarda en innovación tecnolóxica, sendo unha das primeiras entidades financeiras en España que ofrece este servizo.

Cliente en menos 10 minutos e desde o móbil

O proceso para empezar a facerse cliente é moi sinxelo, o usuario ten que descargarse a aplicación de banca móbil de ABANCA na tenda de aplicacións App Store ou Android Play e seleccionar a opción ‘Non son cliente’. O software solicitaralle unha fotografía do seu DNI ou NIE para extraer os datos de forma automática e comprobar que son correctos. Despois pediralle a información económica e persoal que esixe a normativa (ingresos, situación laboral…) e, por último, conectarase por videochamada con persoal de ABANCA para finalizar a contratación. O proceso é totalmente seguro e hai unha dobre validación da identidade do cliente, primeiro comprobando a autenticidade do documento escaneado; e, despois, na videochamada, cun indicador de similitude entre a imaxe do cliente (obtida na videochamada) e a foto do seu DNI.

O desenvolvemento da ferramenta é nativo, realizado polo equipo de Tecnoloxía da entidade financeira galega, o que permite ofrecer unha mellor experiencia de usuario. Todos os recursos do dispositivo optimízanse para ofrecer a mellor calidade de imaxe e audio en cada circunstancia. Ademais, o cliente pode seleccionar o mellor momento para realizar a videochamada e isto só é posible cun desenvolvemento tecnolóxico deste tipo.

“Queremos facilitar aos usuarios a súa relación co banco e que poidan facer as súas xestións de forma rápida e sinxela en calquera momento e en calquera lugar, buscando sempre a mellor experiencia de usuario. Apostamos pola mobilidade, a intelixencia artificial e outras tecnoloxías disruptivas. Obríganos, pero tamén nos encanta ao mesmo tempo, estar á vangarda de todas as innovacións tecnolóxicas“, afirma Eduardo Aldao, director de Innovación de ABANCA.

Unha app de banca móbil cada vez máis innovadora

Coa incorporación do alta de cliente con videochamada a entidade financeira galega aumenta as xestións que os clientes poden facer comodamente desde os seus teléfonos móbiles como apagar e acender tarxetas, aprazar gastos, contratar un préstamo ou tarxeta de crédito, consultar saldos e movementos, facer transferencias, pagar recibos, enviar diñeiro ao caixeiro ou crear tarxetas virtuais para comprar por internet, entre outras.

“A nosa estratexia dixital busca que os nosos clientes poidan realizar, en calquera momento e en calquera lugar, todo tipo de transaccións financeiras e que eles elixan como queren xestionar e contratar os seus produtos con ABANCA, a través de oficinas, da web, do teléfono, da banca electrónica ou da banca móbil. Coa incorporación de novos servizos como este ímolo conseguindo”, asegura Javier Díaz.