ABANCA reforza o seu apoio ao sector primario estremeño logo de comprometerse cos principais sindicatos agrarios da rexión

11-01-2022

ABANCA comeza o ano reafirmando o seu compromiso cos principais sindicatos agrarios de Estremadura, logo de asinar convenios de colaboración con UPA Extremadura e La Unión Extremeña. Estas firmas súmanse ao convenio que a entidade financeira mantén en vigor con APAG Extremadura ASAJA e que serve para ofrecer solucións financeiras a medida para os agricultores agrupados nos tres sindicatos agrarios máis relevantes da rexión.

Estas firmas buscan elaborar unha estratexia común para facilitar a recuperación do sector en Estremadura e garantir a súa viabilidade, centrándose nas súas necesidades crediticias. O director territorial de ABANCA en Estremadura-Sur, Óscar Salgado, o director de zona de ABANCA en Cáceres, Benjamín Gómez, e o coordinador de ABANCA Agro en Estremadura, Roberto Torres, foron os encargados de asinar os novos textos. Por parte dos sindicatos participaron o secretario de UPA Extremadura, Maximiniano Alcón, e o secretario técnico de La Unión Extremeña, Luis Cortés.

Este novo acordo transversal reforza a aposta do banco por un sector de gran importancia na economía da rexión. Potencia fórmulas de crédito deseñadas man a man cos agricultores, que teñen en conta as súas necesidades actuais. Proba diso son produtos e servizos como o préstamo persoal ou o leasing mobiliario, con prazos moi longos que permiten a renovación e modernización de maquinaria e cultivos e a implantación de enerxías renovables.

Máis alá dos proxectos clave do colectivo, ABANCA e os sindicatos agrarios tamén avanzan na oferta de solucións ás necesidades máis perentorias do colectivo. Para iso lanzan produtos como o anticipo da colleita ou o préstamo de campaña, que son empregados polos profesionais para facer fronte aos gastos habituais da próxima colleita. Ademais, a partir de agora contan cunha liña específica de financiamento do seguro agrario que permite amortizar co cobro de colleitas ou da indeminización. Os beneficiarios do convenio poderán gozar doutras fórmulas de financiamento, como a póliza de crédito cun prazo de ata cinco anos, que foi deseñada especificamente para o sector e que facilitará as necesidades de liquidez cun importante aforro nos gastos de formalización.

A estas alternativas personalizadas súmase o financiamento oficial, como un dos puntos máis relevantes do convenio. Dá entrada ás liñas oficiais tanto do ICO como do SAECA e destaca o Instrumento Financeiro de Xestión Centralizada (IIFXC), que incorpora unha garantía de ata o 80% por parte da Administración en actuacións como a compra de explotacións realizadas por agricultores novos ou as necesidades de liquidez sen vincular a investimentos. O acordo tamén abre a porta á comercialización da liña de renovación de maquinaria agrícola posta en marcha recentemente polo MAPA, que inclúe subvencións para avais da SAECA na compra destes elementos por importes de ata 100.000 euros e prazos de ata 10 anos.

Axilidade na tramitación das axudas PAC

Tanto o banco como os sindicatos agrarios traballarán na tramitación das axudas PAC, o que lles permitirá axilizar a domiciliación dos pagamentos e ofrecer alternativas de crédito para o anticipo. Como novidade, ABANCA activou préstamos preautorizados por importes de ata 100.000 euros, que se destinarán ao anticipo das axudas PAC e ao financiamento das primas dos seguros agrarios.

A experiencia da unidade especializada ABANCA Agro, que conta con xestores especializados e solucións a medida, dá continuidade ao compromiso que a entidade financeira mantén co tecido produtivo estremeño e máis concretamente cun dos seus sectores clave.