ABANCA reforza o seu programa de educación financeira coa obra de teatro ‘Laberinto’
- Esta nova montaxe teatral axudará a transmitir aos máis pequenos como as súas decisións poden influír na economía familiar
- Está previsto que asistan ás representacións 9.000 escolares de toda Galicia e por primeira vez haberá funcións en Vilagarcía de Arousa
![20171024-abanca-laberinto 20171024-abanca-laberinto](/img/internas/20171024-abanca-laberinto-c194a10f.jpg)
Os tres actores protagonistas coa directora de RSC de ABANCA, Tatiana Suárez, e a coordinadora adxunta de Educación Superior de Afundación, Carlota Sánchez-Montaña, antes da presentación da obra.
![20171024-abanca-laberinto-01 20171024-abanca-laberinto-01](/img/internas/20171024-abanca-laberinto-01-693c876f.jpg)
![20171024-abanca-laberinto-03 20171024-abanca-laberinto-03](/img/internas/20171024-abanca-laberinto-03-4ca1d4af.jpg)
![20171024-abanca-laberinto-04 20171024-abanca-laberinto-04](/img/internas/20171024-abanca-laberinto-04-48a06bf9.jpg)
ABANCA renovou as actividades do seu programa de educación financeira dirixidas ao colectivo escolar cunha nova obra de teatro que ten como finalidade poder transmitir aos máis pequenos a importancia dunha correcta xestión da economía no fogar e como as súas accións poden ter un papel fundamental para mellorar o aforro familiar.
Esta nova proposta escénica preséntase baixo o título ‘Laberinto’ e foi encargada por ABANCA á compañía teatral Zarándula, profesionais cos que xa traballou o curso pasado cando promoveu este formato innovador para introducir conceptos económicos básicos entre nenas e nenos. O resultado dese primeiro contacto foi ‘Dos contos ás contas’, que se representou con gran éxito ante máis de 8.000 escolares de toda Galicia.
A directora de RSC de ABANCA, Tatiana Suárez, explicou na presentación da nova obra, dirixida a escolares de 4º, 5º e 6º de Primaria, que o banco considera “de vital importancia achegar a estes público conceptos básicos de economía e xestión do diñeiro e que poidan empezar a tomar conciencia da necesidade de realizar un consumo responsable, especialmente nun momento tan sensible como a preadolescencia ou a adolescencia no que se van desenvolvendo comportamentos que fixarán o modo de actuar no futuro”.
Carlota Sánchez-Montaña, coordinadora adxunta de Educación Superior de Afundación, subliñou que as artes escénicas “permiten transmitir mellor as mensaxes que queremos facer chegar e reforzar valores cívicos nos nenos e nenas, xa que ven reflectidos no escenario os mesmos problemas aos que se enfrontan a diario”.
O Teatro Afundación de Vigo acolleu este martes as primeiras funcións de ‘Laberinto’ e os actores protagonistas, María Martínez-Losa, Rubén García e Alejandro López, confirmaron o éxito da montaxe entre os primeiros asistentes.
Tatiana Suárez destacou tamén “a gran acollida que tivo a proposta entre a comunidade docente”. “Ofertamos 8.200 prazas e recibimos máis de 13.000 solicitudes, o que nos obrigou a ampliar as funcións onde era posible e finalmente poderán asistir ás representacións 9.000 nenos e nenas de entre 9 e 12 anos”, indicou a directora de RSC do banco. Ademais, haberá funcións por primeira vez en municipios como Vilagarcía de Arousa (8 novembro), que se suma a Vigo (do 24 ao 27 de outubro), Pontevedra (30 e 31 de outubro), Lugo (2 novembro), Santiago de Compostela (3 novembro), A Coruña (6 novembro), Ourense (7 novembro) e Ferrol (9 novembro).
O uso das artes escénicas no ámbito da educación financeira é unha iniciativa innovadora de ABANCA que foi recoñecida como o mellor proxecto para a xuventude nos premios á Obra Social e á Educación Financeira 2016 que organiza a revista Actualidad Económica en colaboración coa Confederación Española de Cajas de Ahorro (CECA).
Programa de educación financeira
A educación financeira é unha das liñas estratéxicas prioritarias dentro da política de responsabilidade social corporativa que desenvolve ABANCA. Desde que se puxo en marcha o programa no último trimestre de 2015, o banco, en colaboración con Afundación, traballou para ofrecer propostas que cheguen a toda a cidadanía independentemente da súa idade.
Ademais das actividades dirixidas ao público infantil, como as producións teatrais ou o Gran Prix Financeiro, organízanse conferencias para novos estudantes de secundaria e bacharelato sobre economía básica e talleres para o colectivo de xente maior que buscan formalos no uso das novas tecnoloxías aplicadas ao control e xestión das nosas finanzas persoais.
Unha das grandes novidades para este curso 2017-2018 é que se incorporaron ao programa usuarios con discapacidade intelectual. A través dun convenio con Down Coruña ofrecerase formación a un sector da poboación que habitualmente queda á marxe destas accións. Para estes usuarios, dispor dos coñecementos financeiros adecuados pode ser un elemento clave para a súa integración, ademais de mellorar a súa independencia e a súa autoestima.
Ata este momento as diferentes actividades realizadas dentro do programa de educación financeira contribuíron a mellorar a cultura financeira de 18.992 persoas de todas as idades. Delas, 9.785 son nenos e nenas que empezaron a tomar conciencia da importancia de tomar decisións financeiras adecuadas.