Juan Carlos Escotet Rodríguez presenta aos empresarios o proxecto de ABANCA para impulsar o crédito e crecer en Asturias
- O presidente da entidade financeira mantivo un encontro en Oviedo cun centenar de líderes empresariais do Principado
- “Para ABANCA, que xa é líder absoluto na zona noroeste, Asturias é cada vez máis importante”, resumiu Escotet ante os asistentes
Juan Carlos Escotet Rodríguez expuxo ante os empresarios asturianos o proxecto de crecemento do banco a través da concesión de financiamento.
O presidente de ABANCA, durante a súa intervención ante os empresarios asturianos.
ABANCA completou as súas dúas xornadas de actividades en Asturias coa celebración dun almorzo de traballo esta mañá en Oviedo. Nel, o presidente do banco líder no noroeste de España, Juan Carlos Escotet Rodríguez, expuxo a unha ampla representación dos empresarios asturianos o proceso de transformación da entidade e os seus plans para crecer no Principado nos próximos anos a través da concesión de financiamento.
O evento, no que tamén interveu Pedro Luis Fernández Pérez, presidente da Federación Asturiana de Empresarios (FADE), que actuou como entidade colaboradora, contou coa presenza de máis dun centenar de empresarios dos principais sectores do tecido empresarial asturiano. “ABANCA xa é líder absoluto no mercado financeiro do noroeste peninsular, e Asturias é cada vez máis importante para nós”, trasladoulles Juan Carlos Escotet Rodríguez.
A xornada serviu para tratar os principais puntos de interese do actual escenario económico, na súa tripla dimensión internacional, española e asturiana, así como para abordar a translación á actividade empresarial das boas perspectivas existentes nestes momentos. “A recuperación económica e a vixencia dos tipos de interese en mínimos históricos fan deste un bo momento para o investimento empresarial”, explicou Juan Carlos Escotet Rodríguez.
Crecemento enfocado á empresa
Neste contexto de previsible crecemento económico ao longo dos próximos anos, ABANCA fixouse como obxectivo para a súa actividade no mercado asturiano ser unha entidade de referencia para as empresas da comunidade. “Preparámonos para estar en situación de poder dinamizar a concesión de crédito e ser o aliado da empresa en Asturias”, indicou o presidente de ABANCA.
Para iso a entidade desenvolveu unha folla de ruta composta por catro puntos: fortalecemento do seu perfil financeiro, orientación ao mercado con foco no cliente, modernización e innovación tecnolóxica, e, por último, financiamento e colaboración co tecido empresarial asturiano.
A través do primeiro punto desta folla de ruta, ABANCA situouse, en só tres anos, como unha das entidades máis sólidas do sector en España, cunha rendibilidade por encima do custo do capital, un crecemento interanual do volume de negocio minorista do 7,4% e 14 trimestres consecutivos de descenso da morosidade. O banco dispón nestes momentos dunha cómoda posición de liquidez e solvencia que, combinada cunha alta cobertura dos seus activos, sitúana entre as primeiras entidades do sector.
Especialización e innovación
O segundo bloque de accións estivo encamiñado a dotarse dun alto grao de especialización comercial para ofrecer asesoramento e servizos de valor, así como a reforzar a súa capacidade de atención ás empresas e introducir na súa rede o denominado Novo Modelo de Oficina, máis orientado á experiencia do cliente. Todo iso resultou clave para que ABANCA se convertese na entidade financeira con maior crecemento na confianza dos seus clientes (premio Emotional Friendly Bank 2017 de EMO Insights).
Polo que respecta á modernización tecnolóxica, ABANCA investiu 150 millóns de euros en dous anos para situarse na vangarda da innovación aplicada á actividade bancaria.
Tras todo iso, a entidade conta coa posición adecuada para crecer no mercado asturiano a través da concesión de financiamento e a colaboración activa e permanente co tecido económico do Principado
ABANCA en Asturias
Nos últimos doce meses a entidade concedeu en Asturias financiamento por importe de 870 millóns de euros. Froito da súa máxima implicación e compromiso coas empresas e familias asturianas, a entidade practicamente logrou duplicar a súa cota de mercado total en investimento crediticio en só dous anos (xuño 2017 fronte a xuño 2015). Nun contexto de desapalancamiento no que o sistema financeiro do Principado reduciu en 2016 o seu saldo de investimento nun 0,7%, ABANCA elevouno nun 33,7%.
Polo que respecta ao apoio á actividade empresarial, ABANCA, que en Asturias dispón de dúas oficinas especializadas na atención a empresas, participa no financiamento ás principais compañías do Principado e colabora con diferentes institucións, organismos e asociacións do seu tecido económico. O banco figura, así mesmo, entre as cinco principais entidades en financiamento ás institucións asturianas.