A Xunta Xeral de Accionistas de ABANCA aproba a xestión e as contas de 2024
- A entidade pechou os seus primeiros dez anos de traxectoria como unha das entidades máis sólidas da península ibérica
- Inês Oom Ferreira de Sousa, nova conselleira de ABANCA
Integrantes do Consello de Administración de ABANCA na Xunta Xeral de Accionistas.
Descarga en alta resolución Serás redirixido a outro sitio web e abrirase nunha nova ventá
A Xunta Xeral de Accionistas de ABANCA, presidida polo seu presidente, Juan Carlos Escotet Rodríguez, aprobou esta mañá, na súa reunión anual ordinaria, as contas anuais e o informe de xestión da entidade e o seu grupo correspondentes ao exercicio 2024.
De maneira específica aprobouse a xestión da entidade nos ámbitos da sostibilidade e a responsabilidade social. Tamén se aprobaron, igualmente por ampla maioría, o resto das propostas de acordo recollidas na orde do día dunha sesión na que estivo representado o 86,279% do capital social da entidade.
Actividade económica
Os accionistas apoiaron co seu voto a xestión económica da entidade no exercicio 2024, pechado cun beneficio atribuído de 1.203,1 millóns de euros e unha rendibilidade ROTE recorrente do 16,5%. A entidade cumpriu os seus primeiros dez anos de traxectoria no mercado como unha das entidades máis sólidas da península ibérica, grazas á máxima calidade dos seus activos (cociente de morosidade do 2,6%, cobertura do 77,9% e cociente Texas do 26,7%), aos seus robustos niveis de capitalización (CET1 do 12,8% e 1.770 millóns de euros de exceso sobre requisitos), á súa folgada liquidez (cociente LTD minorista do 78,6% e 23.412 millóns de euros en activos líquidos) e aos seus elevados niveis de rendibilidade (16,5% de rendibilidade recorrente en 2024 sen o efecto da integración de EuroBic).
Tras a realización de 10 operacións corporativas integradas exitosamente, ABANCA superou os 128.000 millóns de euros de volume de negocio e afianzouse como competidor relevante no conxunto da península ibérica.
Co peche do pasado exercicio ABANCA culminou o desenvolvemento do seu Plan de Banca Responsable e Sostible 2021-2024, enfocado en apoiar aos seus clientes na súa transición cara a un modelo produtivo máis sostible. En novembro de 2024 a axencia de cualificación Sustainalytics, do grupo Morningstar, situou a ABANCA como a mellor entidade financeira española na súa clasificación de sostibilidade.
Outros acordos
A Xunta Xeral de Accionistas de ABANCA aprobou ademais as propostas de acordo relativas á composición dos seus órganos de goberno: o nomeamento de Inês Oom Ferreira de Sousa como conselleira e a reelección de Rosa María Sánchez-Yebra Alonso. Tamén se aprobou a actualización do sistema de retribución e as modificacións do regulamento do Consello de Administración de ABANCA.
Inês Oom Ferreira de Sousa
Licenciada en Económicas pola NOVA School of Business & Economics de Lisboa en 1992, conta con amplos coñecementos do sistema financeiro portugués pola súa dilatada carreira profesional en distintas entidades lusas.
A nova conselleira incorpórase a ABANCA tras ser entre 2021 e 2024 responsable para Europa de ESG do Banco Santander. Desde 1997 estivo ligada a Santander Totta, onde ocupou distintos postos de responsabilidade en áreas chave vinculadas ao negocio como internacional, banca transaccional, pemes e corporacións ou minoristas, entre outras, desde onde impulsou proxectos estratéxicos para o banco.
Oom conta tamén cunha acreditada traxectoria en tarefas executivas, xa que ostentou o cargo de presidenta do consello de administración da Fundação Santander Portugal. Formou parte tamén do comité executivo de Santander Totta e dos consellos de administración do propio Santander Totta, Mapfre Santander Portugal, Aegon Santander Portugal, Santander Totta Seguros ou Universia Portugal na última década.