ABANCA activa os envíos de diñeiro internacionais a través de Bizum
- A entidade financeira convértese nun dos bancos pioneiros do sector en incorporar esta tecnoloxía, que agora é compatible con usuarios de Italia, Portugal e Andorra
- A nova funcionalidade xa está dispoñible para todos os clientes sen necesidade de realizar ningunha xestión e mantén a mesma sinxeleza e seguridade que antes
Os clientes de ABANCA poden intercambiar pagos instantáneos a través de Bizum con usuarios de Portugal, Italia e Andorra.
Descarga en alta resolución Serás redirixido a outro sitio web e abrirase nunha nova ventá
Os clientes de ABANCA xa poden intercambiar pagos instantáneos a través de Bizum con usuarios de Portugal e Italia. O banco vén de completar os desenvolvementos necesarios para estender esta tecnoloxía a todos os usuarios do servizo, converténdose nunha das entidades pioneiras do sector no país en posibilitar esta operativa.
A partir de agora, os clientes de ABANCA poderán enviar e recibir cartos a través de Bizum procedente dos usuarios italianos subscritos a Bancomat e os portugueses que utilicen a tecnoloxía MB WAY,así como de usuarios andorranos.
Xunto a Bizum, estas dúas plataformas nacionais son as primeiras en incorporarse a EuroPA, o sistema de pago europeo interconectado. Esta iniciativa está destinada a transformar os servizos de pago móbiles no ámbito europeo, e está previsto que próximamente se integren outras plataformas nacionais, como Blik en Polonia, IRIS en Grecia e Vipps MobilePay nos países nórdicos.
Máis opcións, mesma sinxeleza
A operativa para realizar envíos internacionais de diñeiro instantáneo mantén a mesma sinxeleza que ofrecía ata o momento, xa que non hai cambios no funcionamento do servizo nin é necesario actualizar a banca móbil de ABANCA. Para xerar e recibir pagos internacionais, os clientes deberán escoller un destinatario destes países da súa lista de contactos ou introducir directamente o seu número de teléfono co prefixo internacional correspondente.
Tras introducir o importe e a forma de pago, a operación realizarase en cuestión de segundos, tal e como se facía ata agora, co mesmo nivel de seguridade e confianza actuais.
Ademais do envío de diñeiro entre particulares, que agora inclúe novas capacidades internacionais, Bizum tamén permite pagar en tendas en liña, enviar doazóns e mesmo pagar recibos ou impostos sen domiciliación bancaria.
ABANCA incorporou Bizum a finais de 2016 e consolidouse como un dos servizos máis demandados entre os clientes para enviar ou recibir diñeiro de xeito sinxelo e rápido, co simple coñecemento do número de teléfono do destinatario. Actualmente é compatible con 40 bancos españois e andorranos.