ABANCA celebra en Bilbao a IV Xornada de Finanzas Sostibles

27-10-2023

ABANCA celebrou en Bilbao, en colaboración con APD Zona Norte, a IV Xornada de Finanzas Sostibles, un encontro que ten o obxectivo de promover unha reflexión sobre as novas estratexias que poden incorporar as organizacións empresariais para impulsar a sostibilidade, a ética e o compromiso social na súa actividade, cun foco especial no proceso de descarbonización da economía.

O presidente de ABANCA, Juan Carlos Escotet Rodríguez, foi o encargado de inaugurar o encontro, xunto co presidente de APD Zona Norte, Eduardo Junkera, e a presidenta da Confederación Empresarial de Bizkaia (CEBEK), Carolina Pérez Toledo.

Durante a súa intervención, Juan Carlos Escotet subliñou a urxencia de actuar contra o cambio climático e a importancia de que as organizacións de servizos, financeiros ou non, actúen como axentes sensibilizadores “non só das consecuencias que terá permanecer como meros espectadores, senón da sostibilidade como a resposta necesaria e ineludible que demandan os tempos”.

No caso de ABANCA, o presidente destacou que desde o lanzamento do banco, que cumprirá dez anos dentro de oito meses, “deixamos clara nosa disposición, a nosa vontade de crecer e avanzar, e que ese avance fose na dirección da sustentabilidade”. Por ese motivo, remarcou, “as nosas políticas diríxense a prestar apoio aos proxectos de transformación enerxética, a estimular as iniciativas que teñan como meta reducir as emisións de CO2, a promover un marco de pensamento, cada vez máis estendido e compartido, de que a sostibilidade non é unha opción, senón que é o roteiro inevitable e imprescindible ao que están obrigados todos aqueles que teñen a facultade de tomar decisións destinadas a salvar as condicións de vida do noso planeta”.

Descarbonización

O conselleiro delegado de ABANCA, Francisco Botas, participou na mesa redonda ‘Sector financeiro pola descarbonización’, xunto coa subgobernadora do Banco de España, Margarita Delgado, e o director xeral de Elkargi, Zenón Vázquez. O debate foi moderado pola presidenta da AEB, Alejandra Kindelán.

Francisco Botas Iniciou a conversación afirmando que “a sostibilidade é o proxecto máis importante do banco porque é esencial”. Explicou que “a decisión de ABANCA é apoiar con determinación aos diferentes sectores no proceso de transición, favorecendo os investimentos orientados a reducir a intensidade de emisións dos procesos produtivos e ofrecendo ás empresas o asesoramento que necesitan, xa que existe moito descoñecemento aínda do impacto que poden ter as novas esixencias regulatorias, sobre todo entre as pemes”. Tamén puxo en valor iniciativas como ABANCA Energy, o lanzamento de créditos verdes ou "as estratexias de Xestión Discrecional de Carteiras e Fondos ABANCA que incorporan no seu modelo de investimento criterios ESG".

A descarbonización tamén foi un dos eixos centrais do bloque protagonizado polo sector asegurador, xunto coa protección que pode ofrecer fronte ás consecuencias do cambio climático. A directora xeral de ABANCA Seguros, Sonia Lucio, compartiu reflexións co director xeral da Dirección Xeral de Seguros, Sergio Álvarez Camiña e a presidenta de Unespa, Mirenchu do Valle. O director corporativo de CECA, Antonio Romero, dirixiu a conversación.

Transición ecolóxica e investimento social responsable

A responsable de Riscos ESG de ABANCA, Iria Caballero, guiou o panel centrado nos retos e oportunidades que presenta o proceso de transición ecolóxica para o tecido empresarial, que contou coa participación do presidente de Orkestra, Iván Martén; o director xeral de Irizar, Imanol Rego, e o director financeiro de Petronor, Gonzalo Díez-Heppe.

A xornada completouse co debate sobre investimento social responsable moderado pola directora xeral de Inverco, Elisa Ricón. Nel interviñeron a vicepresidenta da CNMV, Montserrat Martínez Parera; o CEO de CAF, Javier Martínez-Ojinaga, e o presidente de Mondragón, Íñigo Ucín.

A organización da IV Xornada de Finanzas Sostibles forma parte da vontade de ABANCA de sensibilizar á sociedade e ao sector empresarial sobre a necesidade de avanzar na consecución dos obxectivos marcados pola Axenda 2030 e de actuar para impulsar a transición cara a un novo modelo económico máis sostible e respectuoso co medio ambiente e as persoas.