ABANCA Deporte Base arrinca a súa cuarta tempada con máis de 14.600 deportistas novos beneficiados

19-09-2018

ABANCASerás redirixido a outro sitio web fai balance do seu programa dirixido a promocionar o deporte entre os máis novos, ABANCA Deporte Base, xusto cando arrinca a súa cuarta tempada. A entidade financeira deu a coñecer hoxe en Santiago de Compostela as principais magnitudes desta iniciativa, nun acto no que participou o presidente de ABANCA, Juan Carlos Escotet Rodríguez, e a Secretaria Xeral para o Deporte, Marta Míguez, e ao que asistiron un centenar de deportistas novos, adestradores e responsables dos clubs beneficiados.

A última convocatoria deste programa converteuse na máis ambiciosa desde a súa creación e son xa 1.325 equipos os que reciben axudas de ABANCA. Estes conxuntos, procedentes de ata 25 deportes diferentes, agrupan a un total de 14.611 deportistas novos inscritos.

Desde a súa presentación en febreiro de 2015, unha das principais liñas de actuación do programa ABANCA Deporte Base é a colaboración coa Fundación Deporte Galego. A entidade financeira aporta anualmente 726.000 euros aos clubs que se inscriben e cumpren os requisitos. Un proceso totalmente transparente e que ofrece apoio económico a través dunha clasificación con baremos claros e criterios técnicos.

Precisamente estes deportistas novos son os protagonistas da nova campaña publicitaria do programa ABANCA Deporte Base pensada para difundir os valores do deporte a toda a sociedade. Nela, un total de 130 nenos e nenas dan a coñecer as boas accións que se desenvolven a diario nos recintos deportivos e a súa aposta por valores como a perseveranza, o xogo limpo, a convivencia, o compromiso, a igualdade, o traballo en equipo, o recoñecemento, a humildade, o afán de superación e o compañeirismo.

Estes deportistas novos pertencen a oito clubs de toda Galicia e de distintas disciplinas: Sociedad Deportiva Tirán (Moaña), Club Atletismo “Ría Ferrol” (A Malata), Club de Rugby Arquitectura Técnica de A Coruña C.R.A.T. (A Coruña), Club Balonmano Porriño, Club Peluquería Mixta Friol (Lugo), Club Ourense Baloncesto COB (Ourense), Arteal Tenis de Mesa (Santiago) e Club de Voleibol Cabo de Cruz (Boiro).

A campaña chegará nos próximos días aos medios a través de diversas pezas protagonizadas por estes deportistas, coa intención de trasladar ao receptor o día a día dos seus protagonistas e así coñecer as súas experiencias deportivas.

O programa ABANCA Deporte Base colle un novo impulso

Pero as novidades presentadas no acto celebrado no Auditorio ABANCA Santiago sobre o programa non acaban só aí. O programa ABANCA Deporte Base iniciará nas vindeiras semanas unha segunda liña de actuación que se traduce nunha serie de encontros con deportistas de elite. A iniciativa, que conta co apoio de Afundación, percorrerá diversos institutos de Galicia e permitirá aos máis novos coñecer a experiencia dos profesionais e preguntarlles as súas dúbidas.

O programa incluirá tamén visitas aos clubs para coñecer as súas necesidades e a publicación do conto A nena que quería voar, que narra a historia dunha rapaza saltadora que cumpre o seu soño con traballo en equipo e perseveranza. O programa ABANCA Deporte Base forma parte do plan estratéxico de patrocinios da entidade e está centrado no apoio ás canteiras dos clubs deportivos e ao fomento do deporte en idade escolar.