ABANCA e Afundación entregan o XL Premio Afundación de Xornalismo Julio Camba a Cristina Sánchez-Andrade
- O artigo premiado, titulado «En manos de Dios», foi publicado en La Voz de Galicia e aborda a ética de determinadas instancias do poder
- O anuncio do fallo do xurado e o acto de entrega do galardón tiveron lugar durante un evento organizado para conmemorar o 40 aniversario do certame
- O banco e a súa Obra Social, Afundación convocaron a nova edición do premio, que incrementa a súa dotación até os 10.000 euros
De esquerda a dereita, Gervasio Posadas, director de Ámbito Cultural El Corte Inglés; Ester Uriol, directora de Comunicación Corporativa de El Corte Inglés; Francisco Botas, conselleiro delegado de ABANCA e patrón de Afundación; Manuel de Lorenzo, finalista; Cristina Sánchez-Andradre, gañadora do premio; Marta García Aller, finalista; Miguel Ángel Escotet, director xeral de RSC e Comunicación de ABANCA e presidente de Afundación, e Pedro Otero, director xerente de Afundación.
A gañadora do XL Premio Afundación de Xornalismo Julio Camba co director xeral de RSC e Comunicación de ABANCA e presidente de Afundación, Miguel Ángel Escotet.
ABANCA e Afundación entregaron o XL Premio Afundación de Xornalismo Julio Camba a Cristina Sánchez-Andradre polo seu artigo «En manos de Dios», publicado en La Voz de Galicia o 11 de maio de 2018. O fallo do xurado deuse a coñecer no marco dun acto celebrado no Círculo de Bellas Artes de Madrid co obxectivo de conmemorar o 40 aniversario do certame. Durante o evento realizouse tamén a entrega do galardón, que conta coa colaboración de Ámbito Cultural El Corte Inglés e está dotado con 6.000 euros.
O conselleiro delegado de ABANCA e patrón de Afundación, Francisco Botas, presidiu a gala, á que asistiron un nutrido grupo de xornalistas, escritores e artistas, como Xosé Hermida, Jenaro Castro, Xabier Fortes, Miguel Ángel Rodríguez, Juan Pedro Aparicio, Jesús Merino, Carmen Posadas, Eduardo Aguirre, Amancio Prada, Antón Patinho o Menchu Lamas, entre outros, que quixeron sumarse a esta homenaxe ao xornalismo literario de opinión e á figura de Julio Camba, o autor natural de Vilanova de Arousa (Pontevedra) que se converteu nun dos cronistas máis brillantes da súa época.
Durante a súa intervención, Francisco Botas sinalou que “ao longo de catro décadas de existencia, o Premio Afundación de Xornalismo permitiunos realizar un recoñecemento a un oficio que desempeña un papel fundamental na sociedade” e enmarcou o apoio de ABANCA a este certame “dentro do firme compromiso da entidade coa promoción e difusión da cultura a todos os niveis”.
O director xeral de RSC e Comunicación de ABANCA e presidente de Afundación, Miguel Ángel Escotet, foi o encargado de ler a acta do xurado, que nesta edición estivo formado polo escritor Alfredo Conde, que exerceu como presidente; a escritora Elvira Lindo; o director de Ámbito Cultural El Corte Inglés, Gervasio Posadas; o director de Comunicación e Relacións Institucionais de ABANCA, Isaac González Toribio, e o historiador, Carlos Valle, como secretario. Na súa decisión, o xurado valorou a actualidade do tema que aborda e a riqueza da linguaxe que utiliza.
Por primeira vez na historia deste galardón, o tribunal tivo que tomar unha decisión entre tres finalistas: Marta García Aller polo texto «Cuéntalo», publicado en El Independiente; Manuel de Lorenzo por «De repente, un runner», aparecido en El Progreso; e Cristina Sánchez-Andrade por «En manos de Dios», publicado en La Voz de Galicia. Este tres textos foron preseleccionados en xuño entre os 114 que se presentaron en total ao certame.
O artigo gañador, xunto cos outros dous finalistas, forma parte do libro conmemorativo que editou Afundación para celebrar o catro décadas deste certame e no que se inclúen todos os artigos distinguidos con este galardón desde a súa primeira convocatoria en 1980.
A premiada agradeceu ao xornalista Luís Pousa, de La Voz de Galicia, a oportunidade de escribir neste diario. "Eu son galega de nacemento aínda que sempre vivín en Madrid e o xornalismo foi unha maneira de conectar con Galicia", sinalou.
Cristina Sánchez-Andrade
Natural de Santiago de Compostela, Cristina Sánchez-Andrade é licenciada en Ciencias da Información e en Dereito. Desenvolveu a súa carreira profesional como escritora, crítica literaria e tradutora. As súas últimas novelas publicadas son «Las Inviernas» (Anagrama, 2014) e «Alguien bajo los párpados» (Anagrama, 2017), merecedoras de varios galardóns e traducidas a varios idiomas. Actualmente vive en Madrid, onde compaxina o seu labor como novelista coa docencia de talleres de Escritura Creativa e colaboracións en distintos medios, entre eles La Voz de Galicia.
XLI Premio Afundación de Xornalismo Julio Camba
ABANCA e Afundación anunciaron durante o evento a convocatoria dunha nova edición do premio, que incrementa a súa dotación até os 10.000 euros.
Poderán presentarse artigos propios do chamado xornalismo literario e de opinión publicados, con nome ou pseudónimo, en calquera medio de comunicación impreso ou dixital de cabeceiras recoñecidas, entre o 1 de xaneiro e o 31 de decembro de 2019. Os textos deberán ter unha extensión máxima de dúas páxinas no caso de edicións impresas e o seu equivalente para as edicións en dixital.
Máis información na web de Afundación.