ABANCA e Afundación lanzan Money Sport para impulsar a educación financeira entre deportistas de base
- A nova proposta está dirixida a adolescentes de 14 a 17 anos que forman parte de clubs deportivos
- O programa utiliza dinámicas gamificadas para conectar co público xuvenil e facilitar a asimilación de contidos
Descarga en alta resolución Serás redirixido a outro sitio web e abrirase nunha nova ventá
ABANCA e a súa Obra Social, Afundación, acaban de poñer en marcha un novo programa de educación financeira, denominado Money Sport, dirixido a deportistas de base. O obxectivo central desta innovadora proposta é proporcionar aos adolescentes as ferramentas e coñecementos necesarios para xestionar as súas finanzas de maneira informada, con especial atención a aqueles que poidan desenvolver unha carreira profesional no ámbito deportivo no futuro.
O programa estrutúrase en catro sesións de 90 minutos de duración cada unha. Nelas, os participantes traballarán competencias clave como a planificación financeira a medio e longo prazo ou a xestión responsable do diñeiro. Para conectar co público novo, todas as xornadas están protagonizadas por un streamer deportivo ficticio, que se encarga de trasladar os conceptos de forma práctica e dinámica.
ABANCA e Afundación apostaron polo uso de dinámicas participativas e gamificadas co fin de que o programa resulte máis atractivo para o colectivo xuvenil e resulte máis fácil asimilar conceptos fundamentais como o aforro, a creación dun fondo de emerxencia, a elaboración de orzamentos, a xestión do risco ou o investimento.
Os primeiros clubs en sumarse a esta iniciativa para impulsar a formación financeira dos seus integrantes máis novos foron o Real Club Deportivo, AD Carballal Balonmán, Club Marín Peixe Galego, Club Tenis de mesa Cidade de Narón, Club Esgrima 100tolos e Club Tea de Mondariz Balneario. Os equipos interesados poden inscribirse no programa a través do formulario en liñaSerás redirixido a outro sitio web habilitado.
Compromiso coa educación financeira
Esta nova iniciativa educativa foi desenvolta por ABANCA e Afundación no marco do acordo de colaboración que manteñen con Funcas para mellorar as competencias financeiras da sociedade.
A posta en marcha de Money Sport reforza o programa de educación financeira que impulsan o banco e a súa Obra Social desde 2015, que o ano pasado chegou a máis de 208.000 persoas.