ABANCA e ARVI reforzan a súa alianza para impulsar a sexta edición do 'Vigo SeaFest'
- O banco amplía a súa colaboración cunha cita gastronómica e musical que xa se converteu nun referente da axenda estival da cidade
- O festival desenvolverase do 10 ao 13 de xullo nos xardíns de Montero Ríos, ofrecendo un escaparate único para a promoción dos produtos do mar e a difusión de prácticas sostibles no sector pesqueiro
Representantes de ABANCA e de ARVI logo de renovar o convenio de colaboración entre ambas as entidades.
Descarga en alta resolución Serás redirixido a outro sitio web e abrirase nunha nova ventá
O presidente de ARVI, Javier Touza, e o director territorial de ABANCA en Vigo, Walter Álvarez, durante a renovación do acordo.
Descarga en alta resolución Serás redirixido a outro sitio web e abrirase nunha nova ventá
ABANCA e a Cooperativa de Armadores de Pesca do Porto de Vigo (ARVI) alíanse para a celebración da sexta edición de ‘Vigo SeaFest’, que terá lugar nos xardíns de Montero Ríos do 10 ao 13 de xullo. O banco dá o seu apoio a esta cita gastronómica, musical, deportiva, divulgativa e cultural coa que colabora desde a súa creación no 2017.
A renovación do convenio de colaboración formalizouse esta mañá na sede de ARVI. O director territorial de ABANCA en Vigo, Walter Álvarez, e o presidente de ARVI, Javier Touza, foron os encargados de asinar o novo documento, que reforza a sólida relación entre ambas as entidades e abre a porta a novas vías de colaboración para seguir impulsando un evento único que pon en valor os produtos do mar. No acto tamén participou Javier Fraga, director de ABANCA Mar.
Este apoio da entidade financeira fai posible unha nova edición do festival. Como en anos anteriores, ‘Vigo SeaFest’ será gratuíto e aberto ao público en xeral, consolidando a súa posición como evento inclusivo e accesible.
Baixo o lema de promover o consumo de peixe, catorce cociñeiros de recoñecido prestixio ofrecerán creacións de autor elaboradas con produtos do mar, destacando a súa calidade e versatilidade. Paralelamente, realizaranse actividades culinarias e educativas para poñer en valor a proteína mariña como fonte de alimento saudable, segura e sostible.
Durante os catro días de festival, o público tamén poderá gozar de actuacións musicais, obradoiros familiares, actividades infantís e propostas deportivas, nunha contorna pensada para toda a familia. O programa completo desta sexta edición estará dispoñible nos próximos días na web oficial do evento: www.vigoseafest.com.
Comprometidos co mundo do mar
A sinatura deste novo convenio para impulsar ‘Vigo SeaFest’ supón un paso máis na sólida e prolongada colaboración entre ABANCA e ARVI. Esta alianza estratéxica non só reforza o compromiso coa promoción do festival, senón que tamén inclúe condicións financeiras vantaxosas para os armadores asociados a ARVI.
Grazas a este acordo, os profesionais do sector poderán acceder a solucións de financiamento flexibles e adaptadas ás súas necesidades específicas, con especial atención aos investimentos dirixidos á mellora da eficiencia enerxética, á preservación da biodiversidade e á redución do impacto climático da frota pesqueira.
Neste contexto, a unidade especializada ABANCA Mar consolídase como unha proposta innovadora no sector, ao ofrecer un catálogo propio de produtos e servizos, así como un asesoramento altamente especializado, baseado no coñecemento directo das necesidades do colectivo pesqueiro.