ABANCA e as confrarías do norte de Pontevedra promoven a renovación da frota e o cambio xeracional no sector

21-06-2023

ABANCA, as confrarías do norte de Pontevedra, a Lonxa de Campelo e Parquistas de Carril, dan un novo paso na senda de cooperación que iniciaron hai anos coa renovación do seu xa histórico acordo de colaboración. O novo texto, creado man a man co sector, ofrece solucións a medida para apoiar a unha actividade económica de gran relevancia dentro do tecido produtivo pontevedrés.

A directora territorial de ABANCA en Pontevedra, Carmen Fernández Penas, foi a encargada de asinar o renovado texto cos representantes das confrarías de Pontevedra, Lourizán, Marín, Vilaboa, Bueu, Carril, Raxó, Sanxenxo, Portonovo, Vilanova, O Grove, A Illa, Cambados, Vilaxoán, e da Lonxa de Campelo e os Parquistas de Carril. Durante o encontro, a representante da entidade financeira estivo igualmente acompañada polo director de ABANCA Mar, Javier Fraga; o coordinador desta unidade, Miguel Ríos; e o coordinador de convenios da territorial de ABANCA en Pontevedra, José Liñeira Folgar.

Axudas para afrontar o reto do cambio xeracional

Con esta firma, as distintas entidades fortalecen o mundo da pesca e o marisqueo en Galicia e dan apoio a toda a cadea de valor do mar, co foco posto en facilitar a transformación do sector baixo parámetros de sosibilidade e favorecer o cambio xeracional, dous aspectos críticos para o seu futuro.

Os documentos, que xa están en vigor, impulsan os novos proxectos empresariais e a mellora competitiva dos actuais. Entre os seus aspectos máis destacados, atópase unha liña de colaboración financeira con condicións específicas para pescadores mozos. Ademais, inclúen tamén unha ampla gama de solucións financeiras que apoian esa aposta pola sostibilidade, contribuíndo a acelerar o proceso de renovación da frota en Galicia e promovendo o uso de embarcacións máis seguras e eficientes.

Do mesmo xeito, o banco ofrece outros produtos pensados para dar resposta ás necesidades particulares de pescadores e mariscadores, como pólizas de crédito que permiten paliar as consecuencias de paros biolóxicos no sector pesqueiro ou o cesamento ou diminución da actividade marisqueira, un produto que estes últimos meses dotou de liquidez a máis de 60 autónomos polo peche do marisqueo ou percebe en varias destas confrarías.

Doutra banda, os protocolos asinados tamén garanten o acceso a outros produtos, como préstamos persoais a medida para o sector, anticipos de subvencións, leasing mobiliario, liñas de comercio exterior, confirming, avais ou seguros especializados, entre outros.

Proxecto PLANCTON

O encontro serviu igualmente para trasladar a estes profesionais as accións desenvolvidas no marco de PLANCTONSerás redirixido a outro sitio web, o Plan de Conservación Territorial que impulsa a Obra Social de ABANCA, Afundación. A responsable de RSC, Pilar Alves, explicou aos representantes das distintas entidades os detalles deste ambicioso proxecto, no que xa colaboran máis de 50 organismos de distintos sectores, e que ten como obxectivo principal fomentar a conservación e sostibilidade das actividades socioeconómicas no medio marítimo. Durante a súa intervención, Alves expuxo as distintas vías de colaboración que abre esta iniciativa que, entre outras actuacións, permitiu retirar das costas de Galicia máis de 45 toneladas de residuos desde o seu inicio en 2021, e unhas 20 no que vai de ano.

Desta forma, grazas á experiencia de ABANCA MarSerás redirixido a outro sitio web e á colaboración con Afundación, o banco continúa apoiando o crecemento e a renovación do sector en Galicia, fomentando ao mesmo tempo a protección do medio mariño e a promoción de prácticas sostibles.