ABANCA e as principais confrarías da Mariña referendan o seu compromiso coa sostibilidade

24-05-2021

ABANCA, a Federación Provincial de Confrarías de Pescadores de Lugo e as principais confrarías da provincia de Lugo unen esforzos co foco posto en facilitar a transformación do sector baixo parámetros de sostibilidade.

O acto tivo lugar en Burela e volveu ser presencial, logo das reunións telemáticas celebradas nos últimos meses con estes representantes. Por parte de ABANCA participaron o director de ABANCA Mar, Javier Fraga, o director de zona na Mariña, Carlos Teijeiro, e o coordinador de ABANCA Mar, Miguel Ríos. Representando ás confrarías asistiron José Basilio Otero Rodríguez, presidente da Federación Provincial de Confrarías de Pescadores de Lugo e patrón maior da Confraría de Pescadores San Xoán Bautista de Burela; Javier Sánchez Fernández, patrón maior da Confraría de Pescadores de San Cibrao; Javier Martínez Otero patrón maior da Confraría de Pescadores de Ribadeo; Diego Pernas Lamelas, patrón maior da Confraría de Pescadores do Vicedo; José Juan Lestegás Iglesias, patrón maior da Confraría de Pescadores de Foz; e Domingo Rey Seijas, patrón maior da Confraría de Pescadores Santiago Apóstolo de Celeiro.

Con esta rúbrica, o banco dá un novo apoio ao avance na mellora da sostibilidade a través do proceso de renovación da frota. Para iso, ABANCA Mar volve a habilitar as hipotecas navais e os préstamos a tipo fixo, que permiten introducir prazos amplos ou carencias para incentivar a construción de novas embarcacións, a remodelación ou a segunda adquisición de barcos máis eficientes e respectuosos co medio ambiente.

O convenio tamén ofrece outro financiamento adaptado e competitivo para investimentos sostibles nos buques e no resto da industria, co ánimo de promover a mellora da eficiencia enerxética e a sostibilidade.

Máis crédito, máis adaptado

Máis alá deste compromiso, ABANCA e as confrarías avanzaron nunha nova proposta integral de crédito que fixa como prioridades adaptarse ás necesidades do sector logo da pandemia. O encontro serviu para fixas as liñas de futuro, compartir os desafíos do sector e recoller propostas do colectivo.

Neste amplo catálogo creado para o mundo do mar, ABANCA tamén pon a disposición destes profesionais toda clase de préstamos persoais, sen xuros ou comisións, con amplos prazos de amortización, para adiar o pagamento de impostos; pero tamén liñas de comercio exterior, leasing mobiliario, confirming, avais, coberturas de prezos sobre gasóleo ou desconto comercial.

A rúbrica deste convenio chega precisamente tras a celebración das XXVIII Xornadas Técnicas de Expomar a pasada semana en Burela. O evento especializado contou este ano coa participación de ABANCA a través do propio director de ABANCA MarSerás redirixido a outro sitio web, Javier Fraga, que moderou unha das mesas de debate. A cita, que se puido seguir telematicamente, reuniu aos principais representantes do sector e a unha nutrida mostra das distintas Administracións públicas.

O acto coas confrarías serviu tamén para presentar algunhas das iniciativas de protección e concienciación do medio ambiente nas que traballa o banco, como o proxecto Redes Vivas ou as actividades de voluntariado e de sensibilización ambiental que realiza Afundación, entre as que destaca este ano o Plan de conservación territorial-ON (PLANCTON), en colaboración coa Fundación Biodiversidad e o Ministerio para la Transición Ecológica y el Reto Demográfico.