ABANCA e Cepesca renovan o seu acordo para prover o sector de servizos e produtos financeiros a medida

26-04-2023

ABANCA e Cepesca renovaron un ano máis o convenio de colaboración que ambas as organizacións teñen en vigor desde 2019 e que ten como obxectivo proporcionar aos asociados da patronal española asesoramento e produtos e servizos financeiros especificamente deseñados para as súas particularidades. ABANCA desenvolve este labor a través da súa unidade de negocio ABANCA MAR, especializada no sector pesqueiro e única no ámbito financeiro español.

Con esta renovación, ambas as entidades cumpriron xa cinco anos de traballo conxunto que se traduciu no financiamento de case 400 operacións. Na súa maioría, vinculadas á mellora dos buques pesqueiros en diferentes aspectos, como a sostibilidade, a dixitalización, a eficiencia enerxética, a descarbonización ou a mellora das condicións a bordo.

Así mesmo, durante este período, as dúas entidades colaboraron estreitamente no financiamento de diferentes Organizacións de Produtores Pesqueiros (OPP). Neste sentido, ABANCA destaca o apoio prestado a Pesca España, Asociación de Entidades Pesqueiras (AOP) a recentemente creada e coa que a entidade prevé enriquecer a partir de agora as súas vías de colaboración debido ao potencial de crecemento desta asociación.

O convenio con ABANCA permite aos asociados de CEPESCA acceder a produtos e servizos financeiros desenvolvidos a medida e tendo en conta as peculiaridades do sector, ademais de contar con asesoramento, pero caracterizado por un profundo coñecemento do sector. Todo isto posibilita unha adaptación e evolución da oferta financeira de ABANCA MAR, dinámica e segundo a realidade de cada momento.

Neste sentido, o equipo de traballo conxunto de ABANCA e Cepesca anunciou durante a sinatura, ir afondando, por exemplo, en fórmulas de financiamento para o desenvolvemento de proxectos aliñados cos Obxectivos de Desenvolvemento Sostible (ODS), no ámbito da sostibilidade ou as destinadas a paliar situacións de peche temporal de caladoiros ou paros biolóxicos. Tamén se sinala como obxectivo a mobilización de fondos do novo FEMPA (Fondo Europeo Marítimo de Pesca e Acuicultura) ou os destinados a mellorar a sostibilidade da frota.

Armadores novos

Na firma de renovación anunciouse unha liña de colaboración financeira con condicións específicas para armadores novos. Esta ten como obxectivo promover e favorecer a substitución xeracional dentro do sector, aspecto crítico para o seu futuro. Esta decisión enmárcase na aposta de ambas as organizacións por traballar para fortalecer o sector pesqueiro, así como a súa resiliencia.

Por último, ABANCA e Cepesca tamén anunciaron a súa intención de incrementar o desenvolvemento de accións conxuntas de fomento da concienciación medioambiental a través de diversas accións de retirada de residuos do medio mariño. A este respecto, e como aconteceu desde a súa creación, o convenio busca crear un marco de colaboración estable para impulsar actividades que dean visibilidade aos retos do sector, así como para abordar a celebración de todo tipo de xornadas e eventos sectoriais. Dentro del, ten un peso específico importante a área de formación e divulgación das mellores prácticas pesqueiras.

O director executivo de Banca Corporativa, Empresas e Pemes de ABANCA, Víctor Casal Antón, e o presidente de Cepesca, Juan Manuel Liria Franch, foron os encargados de asinar a renovación do convenio de colaboración. No acto tamén estiveron presentes os vicepresidentes e o secretario xeral da asociación de pescadores, Julio Morón e Javier Garat, respectivamente, así como o director de ABANCA MAR, Javier Fraga.

Segundo Juan Manuel Liria, “para o sector pesqueiro, a renovación deste convenio vai máis alá de contar cun socio financeiro fiable capaz de comprender a nosa contorna e peculiaridades. E digo isto porque os últimos cinco anos –engade Liria– foron especialmente convulsos para a nosa actividade pola crise sanitaria, a posterior invasión de Ucraína por parte de Rusia e o seu brutal impacto nos nosos custos de explotación debido ao aumento do combustible ou o desenvolvemento dunha lexislación europea cada vez máis influenciada por ecoloxistas radicais. ABANCA –rematou dicindo Liria– soubo fluír ao noso carón de xeito impecable para axudarnos a superar todos estes obstáculos e a nosa esperanza é que esta relación siga por moitos anos máis”.

Pola súa banda, destacou Víctor Casal que “este acordo é fundamental para ABANCA, xa que permite dialogar continuamente con Cepesca e asociados e traballar conxuntamente en proxectos como a renovación da frota e situacións de paralización estacional da actividade do sector. Tamén demostra o mantemento e compromiso de ABANCA coa súa división ABANCA MAR, polo sector da economía azul e concretamente polo sector armador. Os grupos de traballo creados entre ambas as entidades seguirán dando os seus froitos mobilizando máis fondos e tamén traballaremos en liñas de colaboración que perseguen a sostibilidade no ámbito social, económico e ambiental. Cepesca e os seus asociados poden contar coa nosa entidade para afrontar os retos actuais e futuros, xa que para ABANCA o sector do mar sempre será prioritario”.

Sobre Cepesca

Cepesca, a organización empresarial nacional máis representativa da Unión Europea, agrupa a 42 asociacións de armadores de buques de pesca de baixura e alta mar, con máis de 800 empresas pesqueiras, 928 embarcacións, máis de 10.000 tripulantes e unha tonelaxe de 218.821,94 GT. Entre os seus obxectivos, busca mellorar a competitividade das empresas pesqueiras, apostar pola formación de tripulacións e a substitución xeracional, promover o desenvolvemento dunha pesca responsable e sostible e loitar contra a pesca ilegal.

Sobre ABANCA

ABANCA é a entidade financeira de referencia no noroeste peninsular. A través da súa unidade especializada ABANCA Mar, creada en 2016, ofrece unha proposta de valor única no sector na que combina un amplo coñecemento, unha atención especializada a través de xestores altamente formados e un catálogo de produtos adaptado ás súas necesidades.