ABANCA e Endesa asinan un acordo de subministración de enerxía eólica de orixe galega a longo prazo
- O contrato cobre a prezo estable o 70% da demanda de electricidade de ABANCA en España e Portugal para os próximos 10 anos
De esquerda a dereita, o conselleiro delegado de ABANCA, Francisco Botas, e o director xeral de Comercialización de Endesa, Javier Uriarte.
Descarga en alta resolución Serás redirixido a outro sitio web e abrirase nunha nova ventá
De esquerda a dereita, o director xeral de Comercialización de Endesa, Javier Uriarte, e o conselleiro delegado de ABANCA, Francisco Botas.
Descarga en alta resolución Serás redirixido a outro sitio web e abrirase nunha nova ventá
ABANCA e Endesa subscribiron un acordo de colaboración en enerxía renovable para cubrir con enerxía de orixe galega a maior parte da demanda de electricidade da entidade financeira dos próximos dez anos. O contrato garante a ABANCA a subministración de enerxía renovable en condicións de estabilidade de prezos e suporá a construción en Galicia dun novo parque eólico de Endesa.
O contrato foi subscrito na sede de ABANCA na Coruña polo conselleiro delegado da entidade financeira, Francisco Botas, e o director xeral de Comercialización de Endesa, Javier Uriarte.
“Este acordo permítenos promover a sostibilidade no noso funcionamento como organización garantindo a orixe local e renovable da enerxía que consumimos. Ademais supón a posibilidade de desenvolver en Galicia novos proxectos nun sector altamente tecnolóxico e estratéxico”, valorou o conselleiro delegado de ABANCA, Francisco Botas.
O convenio “confirma a aposta de Endesa e ABANCA pola sostibilidade e ten unha gran transcendencia en Galicia, unha comunidade á que Endesa estivo ligada historicamente e na que hoxe queremos estar máis presentes que nunca. Cos contratos de compravenda de enerxía a longo prazo, grandes consumidores poden beneficiarse dunhas condicións estables de subministración durante longos períodos dando certidumbre á xestión das súas necesidades enerxéticas, á vez que apostan polas enerxías renovables libres de emisións”, sinalou o director xeral de Comercialización de Endesa, Javier Uriarte.
O acordo entrará en vigor o 1 xaneiro de 2022 e ten unha vixencia de dez anos. Durante ese período, Endesa subministrará a ABANCA enerxía de orixe eólica para cubrir o 70% da demanda de electricidade das súas oficinas e sedes de España e Portugal.
A enerxía subministrada procederá integramente de parques eólicos situados en Galicia ao longo da duración do acordo. Inicialmente, terá a súa orixe en instalacións de Endesa xa existentes neste momento na provincia de Lugo. A partir de xaneiro de 2023 a enerxía será xerada por novas instalacións renovables de Endesa en Galicia que están en proceso de tramitación.