ABANCA finaliza con éxito a integración de EuroBic e reforza o seu posicionamento en Portugal

24-11-2025

ABANCA completou a integración de EuroBic e dá por finalizado de maneira definitiva o proceso iniciado en xullo do ano pasado, data na que se pechou o acordo de compravenda. Durante esta fin de semana tiveron lugar a integración xurídica, a migración tecnolóxica do negocio de EuroBic á plataforma ABANCA e o cambio de marca nas oficinas e caixeiros, as últimas accións do proceso de integración que quedaban por executar. Todas elas realizáronse segundo o previsto. Desta maneira, o banco abre nova etapa en Portugal co obxectivo de reforzar a súa posición no mercado portugués e ibérico.

“Esta operación proporciónanos unha plataforma para seguir crecendo en Portugal de maneira orgánica, posicionándonos como unha entidade de referencia para as empresas e os particulares a través dun modelo de banca innovador e altamente tecnolóxico”, destaca o presidente de ABANCA, Juan Carlos Escotet Rodríguez.

“A calidade do noso equipo no país, que acredita un profundo coñecemento do mercado portugués, sumada ás nosas capacidades e enfoque especializado, permítennos chegar a segmentos craves na nosa estratexia a través dunha proposta de valor diferencial”, explica o conselleiro delegado, Francisco Botas.

Integración exitosa

A de EuroBic é a integración de maior alcance das dez que ABANCA realizou no últimos dez anos, acreditando a súa capacidade de planificación e execución neste tipo de operacións.

Os clientes de EuroBic operan xa con normalidade na nova plataforma e benefícianse desde este momento das vantaxes que para eles supón a incorporación a ABANCA, en especial un catálogo de produtos e servizos máis amplo e diversificado e unhas maiores capacidades tecnolóxicas. Entre elas destaca a integración da intelixencia artificial xenerativa (IAX) na web e a banca móbil do banco, para a atención de consultas de clientes e non clientes a través do servizo Sofia.

En todas as fases desenvolvidas nos últimos dous anos no conxunto do proceso de integración traballaron 700 persoas organizadas en 13 equipos, cunha cifra de 410.000 horas de traballo e 3.350 tarefas completadas.

As oficinas integradas esta fin de semana locen desde hoxe luns o nome ABANCA como única marca. Na operación de substitución participou un equipo formado por máis de 250 persoas entre técnicos externos e persoal do banco.

Nova gobernanza

A nova etapa que o banco abre en Portugal tamén supón cambios societarios e de gobernanza. Desde este momento, ABANCA desenvolve a súa actividade no país de forma exclusiva a través da sociedade ABANCA Portugal, S.A.

O ata o de agora responsable de ABANCA en Portugal, Pedro Pimenta, será o presidente da Comisión Executiva da entidade resultante da integración e máximo responsable do banco no país. Con experiencia no sector financeiro desde 1989, incorporouse ás entidades de orixe de ABANCA en 1999 para constituír a sucursal en Portugal, que dirixía ata o de agora. Entre 2003 e 2008 desempeñou o cargo de director de Negocio Internacional e posteriormente liderou a integración en ABANCA do negocio adquirido a Deutsche Bank.

Negocio rendible e de alta calidade

Coa operación, ABANCA dá un forte impulso á súa actividade en Portugal e posiciónase como unha das principais entidades bancarias do país, mercado estratéxico para ABANCA como entidade financeira con vocación ibérica. Tras a integración, ABANCA xestiona en Portugal un volume de negocio de 20.635 millóns de euros (8.757 millóns en crédito á clientela, 9.159 millóns en depósitos da clientela e 2.718 millóns en recursos fóra de balance) e conta cunha rede comercial de 230 puntos de venda distribuídos por todo o país. A carteira presenta unha elevada calidade, cun cociente de morosidade do 2,4% e unha cobertura do 84,9%.

A operación é plenamente complementaria desde o punto de vista comercial, xa que abre para ABANCA en Portugal un maior desenvolvemento en banca universal, supón claras sinerxias de ingresos, e reforza o seu posicionamento en varias liñas de negocio estratéxicas, como fóra de balance, seguros e medios de pago.

A integración de negocios adquiridos foi un dos piares da estratexia de crecemento do banco desde o seu lanzamento en 2014. O outro é o crecemento orgánico, que no primeiros nove meses deste ano achegou 118.000 novas altas de clientes no conxunto de España e Portugal.