ABANCA inaugura no Museo de León a exposición ‘Pintura escrita. Arte e Literatura. Colección ABANCA’

21-03-2024

ABANCA inaugurou en León a exposición ‘Pintura escrita. Arte e Literatura. Colección ABANCA’. O proxecto reúne 29 obras da súa colección de arte que, na súa maioría, non se mostraron ata o momento na cidade. A mostra, que conta coa colaboración da Junta de Castilla y León e o Concello da cidade, poderá visitarse no Museo de León ata o próximo 30 de xuño.

O acto de inauguración convocou no Edificio Pallarés a preto dun centenar de persoas de todos os sectores da sociedade leonesa, que puideron gozar en primicia da exposición. Entre elas, o alcalde de León, José Antonio Dez, e a xefa do Servicio Territorial de Cultura da Junta de Castilla y León, Amelia Biaín.

O presidente de ABANCA, Juan Carlos Escotet Rodríguez, destacou durante a súa intervención que esta exposición dá continuidade ao ciclo iniciado en 2016 e agradeceu tanto a colaboración institucional como a magnífica resposta recibida nas tres ocasiones anteriores por parte do público leonés. “Grazas por abrirnos as portas deste espazo impecable; grazas por facilitar este novo regreso a León; grazas por permitirnos cumprir coas promesas que fixemos aos leoneses hai xa oito anos”, afirmou ante as persoas asistentes.

A xefa do Servicio Territorial de Cultura, Amelia Biaín, tamén fixo fincapé na suma de esforzos institucionais. “Cabe destacar a importancia da colaboración publico-privada que posibilita, de novo, expoñer no Museo de LeónSerás redirixido a outro sitio web esta serie de obras, abrindo ao público da provincia a arte de grandes autores", sinalou.

O alcalde de León, José Antonio Dez, subliñou no seu discurso que “ABANCA foi unha das entidades bancarias cooperadoras e son decenas as mostras da súa responsabilidade social en axudas aos clubs deportivos, financiamento de eventos de todo tipo e participación na sociedade leonesa. Para nós contar con entidades que van máis aló do que sería a súa responsabilidade que, neste caso, é atender aos seus clientes e facelo dunha forma adecuada e satisfactoria para eles, manter o emprego e as oficinas na cidade, é un valor destacable”.

Invitación a mirar e a ler

Como indica o propio título da mostra, arte e literatura comparten protagonismo neste novo proxecto expositivo que promove ABANCA en León. As 29 obras seleccionadas entre os numerosos fondos da Colección ABANCA pertencen a creadores de diferentes épocas e estilos, que, dalgunha maneira, remítennos ou inclúen referencias ao campo das letras e a literatura. Así, as obras expostas, compleméntanse con fragmentos escritos que nacen de diversos poemas, novelas ou ensaios. Convídase ao espectador a mirar, pero tamén a ler.

Na relación de artistas escollidos para esta proposta expositiva atopamos creadores con gran recoñecemento nacional e internacional, como André Lhote, Urbano Lugrís, Manuel Viola, Luis Seoane, José Frau ou Carlos Alcolea, xunto con outros máis contemporáneos como Juliâo Sarmento, Antón Lamazares ou Pamen Pereira. As citas literarias que acompañan aos cadros pertencen a grandes autores da literatura universal, como Platón, Thomas Mann, Paul Auster, Valle Inclán ou Lewis Carrol, que comparten protagonismo con algúns dos escritores máis sobresalientes das letras leonesas: Julio Llamazares, Antonio Gamoneda, José María Merino, Luis Mateo Díez ou Juan Pedro Aparicio, entre outros.

Este proxecto dá continuidade ao primeiro ciclo de exposicións organizado por ABANCA en León entre os anos 2016 e 2019, no marco dun acordo subscrito coa Junta de Castilla y León e o Concello de León. En concreto, realizáronse tres proxectos que presentaron ao público leonés os grandes bloques nos que se organiza a Colección ABANCASerás redirixido a outro sitio web: Picasso e as vangardas internacionais e a arte española e internacional da segunda metade do século XX.

‘Pintura escrita. Arte e Literatura. Colección ABANCA’ estará aberta ao público no Museo de León en horario de martes a sábado de 10 a 14 horas e de 16 a 19 horas. Os domingos poderá visitarse de 10 a 14 horas e os luns permanecerá pechada.