ABANCA inicia a terceira edición do seu plan de formación de persoas maiores no rural en Coristanco e Milladoiro
Unha das sesións formativas organizadas en 2023, durante a segunda edición do programa.
ABANCA inicia esta semana a terceira edición do seu plan de formación e capacitación dixital de persoas maiores nas localidades do rural. A iniciativa forma parte do programa de educación financeira do banco e ten como obxectivo mellorar a inclusión financeira da poboación que vive en contornas rurais.
O programa púxose en marcha en 2022 e nas súas dúas primeiras edicións sumou 114 accións formativas en municipios das catro provincias galegas nas que participaron preto de 1.200 persoas.
As primeiras sesións desta nova convocatoria terán lugar no Edificio de Servizos Múltiples do Concello de Coristanco o martes 5 e o mércores 6 de marzo, en horario de 10.00 a 12.00 horas. A terceira será o xoves 7, de 12.00 a 14.00 horas, en Milladoiro, no Local Social JUPEMI da Unión de Consumidores de Galicia (UCGAL).
Estas actividades estarán centradas no uso dos caixeiros automáticos e estruturaranse en dúas partes, unha teórica e outra práctica, co fin de ofrecer aos asistentes unha visión completa de como funciona o caixeiro, cales son as operacións máis habituais que se poden realizar nel e mostrarlles o sinxelo que resulta facer esas xestións a través dunha demostración no propio dispositivo. Ademais, durante a formación facilitaránselles consellos básicos de seguridade, sobre banca móbil e resolveranse todas as dúbidas que expoñan.
De forma complementaria, todos os participantes recibirán un manual sinxelo que recolle toda a información ofrecida durante a sesión para que poidan tela a man e consultala en calquera momento.