ABANCA Innova estrea instalacións na sede corporativa do banco en Vigo
- O edificio de García Barbón incorpora un espazo de apoio ao ecosistema emprendedor de máis de 400 metros cadrados con postos de traballo, salas de reunións e espazos multiusos
- A apertura permite multiplicar as capacidades de ABANCA Innova, que aterra no corazón do centro financeiro da cidade logo de ter establecido lazos con máis de 1.000 proxectos innovadores desde a súa creación
De esquerda a dereita, Águeda Ubeira, CEO e fundadora de Vanetta Food e presidenta de AJE Vigo; José Antonio Suárez, responsable de ABANCA Innova; Eduardo Aldao, director de Solucións de Medios de Pago e Innovación de ABANCA; José Manuel Valiño, director xeral de IT, Información, Procesos e Operacións de ABANCA e Walter Álvarez, director territorial de ABANCA en Vigo.
Descarga en alta resolución Serás redirixido a outro sitio web e abrirase nunha nova ventá
De esquerda a dereita, Águeda Ubeira, CEO e fundadora de Vanetta Food e presidenta de AJE Vigo; José Antonio Suárez, responsable de ABANCA Innova; Eduardo Aldao, director de Solucións de Medios de Pago e Innovación de ABANCA; Walter Álvarez, director territorial de ABANCA en Vigo e José Manuel Valiño, director xeral de IT, Información, Procesos e Operacións de ABANCA.
Descarga en alta resolución Serás redirixido a outro sitio web e abrirase nunha nova ventá
De esquerda a dereita, José Antonio Suárez, responsable de ABANCA Innova; Águeda Ubeira, CEO e fundadora de Vanetta Food e presidenta de AJE Vigo; Walter Álvarez, director territorial de ABANCA en Vigo e José Manuel Valiño, director xeral de IT, Información, Procesos e Operacións de ABANCA.
Descarga en alta resolución Serás redirixido a outro sitio web e abrirase nunha nova ventá
ABANCA estrea un novo espazo de innovación e emprendemento na súa sede corporativa de Vigo. A entidade financeira inaugurou esta mañá as instalacións de ABANCA Innova na cidade, situadas no edificio que o banco ten en pleno centro financeiro e comercial en García Barbón.
Para dar a coñecer a nova sede de ABANCA Innova, o banco organizou unha xornada de traballo na que participaron unha vintena de representantes do mundo do emprendemento e a innovación da área de Vigo. O evento contou coa intervención do director xeral de IT, Información, Procesos e Operacións de ABANCA, José Manuel Valiño, e do director territorial de ABANCA en Vigo, Walter Álvarez. O responsable de ABANCA Innova, José Antonio Suárez, foi o encargado de conducir a visita polas novas instalacións.
As recentemente estreadas instalacións do espazo de innovación e emprendemento de ABANCA ocupan aproximadamente 410 metros cadrados na planta baixa, con acceso directo desde a entrada principal en García Barbón. Unha gran zona de coworking áxil na entrada articula un espazo que suma tres zonas modulares con 32 postos de traballo, tres salas de reunións e un espazo multiusos cunha pantalla de grandes dimensións. As instalacións complétanse cun espazo de pícnic equipado con electrodomésticos e mobiliario.
Todo o espazo, que destaca pola súa amplitude e pola luz natural que entra a través das súas amplas fiestras ás rúas Colón, García Barbón e Rosalía de Castro, combina un deseño moderno cos máis altos estándares de confort para traballar.
Onde nace a innovación
A chegada de ABANCA Innova á sede corporativa do banco supón un impulso tanto ao compromiso da entidade coa apertura do edificio á economía e á sociedade como ao propio proxecto da aceleradora fintech da entidade financeira.
ABANCA Innova comezou a súa andaina en 2016 na Coruña coa misión de apoiar a creación e o desenvolvemento de empresas emerxentes nadas ou radicadas en Galicia. Aínda que desde o principio se centrou en sectores como fintech, insurtech, regtech, sostibilidade e ciberseguridade, ao longo dos anos a súa contribución foi clave para o avance doutras áreas con impacto na industria financeira.
Nos últimos nove anos, ABANCA Innova converteuse nun actor clave no ecosistema innovador de España e Portugal, transformándose dun programa de aceleración nun proxecto máis amplo que colabora directamente con compañías emerxentes. Arredor de 1.000 empresas participaron nas diversas actividades organizadas por ABANCA Innova, en máis de 250 eventos e en máis de 50 probas de concepto executadas a través dos seus propios programas de startups e en colaboración con Lanzadera. Na actualidade, e ata o vindeiro 7 de novembro, está aberto o prazo de inscripción para participar na undécima edición do seu Programa para Startups.
A estrea de ABANCA Innova no edificio tamén permitirá ao banco reforzar aínda máis o seu apoio ao sector produtivo de Vigo e a súa contorna. A proximidade física destas novas instalacións á Oficina de Empresas e a experiencia acumulada neste campo serán claves para configurar un novo ecosistema startup na sede de García Barbón e erixirse como polo de atracción de innovación.
Un edificio aberto ao futuro
A estrea destes máis de 400 metros cadrados abertos á innovación non só busca fomentar os proxectos de ABANCA Innova, xa que as instalacións están deseñadas tamén para acoller emprendedores a través de diversas fórmulas onde prima a flexibilidade. Para iso, a entidade financeira puxo en marcha varios plans que permiten dispoñer de postos de traballo por periodos, acceder a salas de reunións e mesmo a organización de eventos no espazo multiusos. En virtude destes acordos, desde principios de outubro, xa hai emprendedores traballando nestas instalacións.
A apertura de ABANCA Innova supón para a entidade financeira culminar un novo fito no seu proxecto de transformación do histórico edificio de García Barbón para abrilo á economía e á sociedade de Vigo.