ABANCA pecha unha nova emisión de bonos verdes
- A entidade emitiu títulos a seis anos por importe de 500 millóns cun cupón do 5,25%
- A demanda chegou a superar o dobre do importe emitido
- Con esta emisión ABANCA aumenta os seus colchóns anticrisis e avanza na súa folla de ruta para o cumprimento dos requisitos do regulador en materia de MREL
Descarga en alta resolución Serás redirixido a outro sitio web e abrirase nunha nova ventá
ABANCA pechou hoxe os termos económicos para a súa segunda emisión de bonos verdes Senior Preferred por importe de 500 millóns de euros cun cupón do 5,25%, tras a exitosa emisión inaugural do ano pasado. Os ratings de Fitch (BBB-) e Moody´s (Baa3) confiren aos títulos o grao de investimento (Investment Grade) permitindo acceder á parte máis esixente do espectro investidor.
A emisión espertou gran interese entre os investidores, cunha demanda que chegou a superar o dobre do importe emitido e máis de 100 ordes individuais. A emisión foi colocada entre clientes profesionais e contrapartes elexibles, con notable presenza de investidores especializados con perfil ASG, que apreciaron o rigor no enfoque ASG, apoiado pola opinión de Sustainalytics sobre o marco.
ABANCA continúa avanzando con esta emisión na súa folla de ruta de cara ao cumprimento do requirimento mínimo de fondos propios e pasivos admisibles (MREL polas súas siglas en inglés) fixado polo regulador. Con esta emisión, a entidade xa supera en máis de 210 puntos básicos o requisito MREL marcado para 2022.
Tras esta colocación, ABANCA aumenta os seus colchóns anticrisis ademais de cumprir cun dos obxectivos marcados no Plan de acción de Banca Responsable e Sostible 21-24 da entidade.
Plan de acción de Banca Responsable e Sostible 21-24
O compromiso co medio ambiente e a banca socialmente responsable formaron parte de ABANCA desde a súa orixe e son principios directores da súa actuación. O plan de acción fortalece ese compromiso con instrumentos como a emisión de bonos verdes, que é unha panca relevante para articular correctamente a transición cara a unha economía sostible, e a entidade cumpriu os requisitos necesarios para acceder con eficiencia a este mercado unha vez máis.