ABANCA presenta os novos servizos centrais da súa sede de Vigo
- O investimento do banco no proxecto de transformación supera os 25 millóns de euros
- A entidade financeira estrea tres plantas que albergan a 550 profesionais de servizos centrais, da dirección territorial de Vigo e de ABANCA Conecta
- Este proxecto, que abrangue 6.500 m², complétase logo de abordar previamente a reforma integral da oficina principal e a creación das novas instalacións de ABANCA Innova. En total, 8.400 m2, modernizados
- Os novos espazos foron creados baixo o deseño open space, que reforza o traballo en equipo, a flexibilidade e a sostibilidade
- O banco reforza a súa presenza en Vigo, onde se mantén como a entidade financeira de referencia, e continúa a dotar de novas capacidades á sede de García Barbón
O presidente de ABANCA, Juan Carlos Escotet Rodríguez; o conselleiro delegado, Francisco Botas; e o alcalde de Vigo, Abel Caballero; xunto ao equipo de García Barbón.
Descarga en alta resolución Serás redirixido a outro sitio web e abrirase nunha nova ventá
O presidente de ABANCA, Juan Carlos Escotet Rodríguez; o conselleiro delegado, Francisco Botas; e o alcalde de Vigo, Abel Caballero; visitan as distintas plantas do edificio de García Barbón.
Descarga en alta resolución Serás redirixido a outro sitio web e abrirase nunha nova ventá
O presidente de ABANCA, Juan Carlos Escotet Rodríguez; o conselleiro delegado, Francisco Botas; e o alcalde de Vigo, Abel Caballero; no patio interior do edificio de García Barbón.
Descarga en alta resolución Serás redirixido a outro sitio web e abrirase nunha nova ventá
ABANCA estreou as súas novas instalacións corporativas en Vigo, situadas no emblemático edificio que a entidade financeira posúe en García Barbón. O presidente de ABANCA, Juan Carlos Escotet Rodríguez, e o conselleiro delegado, Francisco Botas, deron a coñecer esta mañá o novo aspecto dunha sede con sete décadas de historia, nunha presentación á que asistiu o alcalde do Concello de Vigo, Abel Caballero, e arredor de 550 profesionais do equipo de ABANCA.
A finalización desta fase supón un paso adiante na transformación da sede viguesa do banco. Tras abordar previamente a reforma integral da oficina principal e a creación das novas instalacións de ABANCA Innova na cidade, a actuación que agora se desvela centrouse en transformar por completo a aparencia e o uso dos espazos que albergan aos profesionais dos servizos centrais, da dirección territorial de Vigo e de ABANCA Conecta. O investimento total de ABANCA no proxecto de remodelación da súa sede de García Barbón supera os 25 millóns de euros.
Con esta presentación conclúe unha nova fase na transformación do inmoble, a máis significativa tendo en conta a superficie sobre a que se actuou, os usos definidos dos novos espazos e o número de profesionais que alberga. As obras seguen nas plantas superiores para habilitar novas áreas institucionais e de banca privada e onde tamén, de maneira exclusiva, se situarán socios de primeiro nivel de diversos sectores, co obxectivo de xerar sinerxías. Tamén no último andar do inmoble, en comercialización para proxectos de restauración e cunha localización privilexiada e unha vista panorámica exclusiva e inédita da ría.
O espazo ao servizo das persoas
A transformación destas tres novas plantas da sede de García Barbón levouse a cabo coa mesma idea: garantir que os espazos estean ao servizo das persoas. En total, actuouse sobre máis de 6.500 metros cadrados nesta fase, que permiten acadar os 8.400 metros cuadrados xa transformados, que incorporan o novo modelo corporativo: as instalacións están deseñadas para promover o traballo colaborativo e flexible, crean espazos máis abertos, incorporan a última tecnoloxía e son decididamente máis sostibles, tanto na súa construción como no seu uso diario. Ademais, as obras compatibilizaron o seu avance cos propios usos do edificio, baixo a premisa de reducir ao máximo o seu impacto na actividade administrativa e comercial.
Os postos de traballo distribuíronse a través de mesas compartidas situadas xunto ás fiestras, co co obxectivo de favorecer a iluminación natural e aproveitar o feito de que todas as fachadas do edificio dan a rúas amplas. A escolla de cores neutras, xunto coa iluminación LED complementaria, crean un ambiente de traballo acolledor.
Precisamente o compromiso coa sostibilidade é un dos vectores da actuación no edificio. Máis alá da transformación do espazo, implementáronse novos protocolos de acordo co Plan Estratéxico de Sostibilidade de ABANCA, que resultaron nunha redución da pegada ambiental. Trátase de medidas tanxibles destinadas a reducir o consumo de papel, auga e outros recursos, pero tamén do consumo de enerxía e o uso de fontes renovables.
No espazo interior do edificio, arredor do amplo patio central que culmina nun impresionante atrio acristalado a uns 40 metros de altura, dispuxéranse 34 salas de reunións de diferente capacidade, a maioría equipadas para videochamadas. Uns recursos funcionais permiten a conexión remota con outros equipos, que se complementan con 35 cabinas individuais distribuídas polas tres plantas. Todo iso sen esquecer 16 salas de reunións abertas que fomentan o traballo colaborativo máis informal.
Cada un dos tres novos niveis foi equipado con espazos pícnic, dotados de electrodomésticos e mobiliario, para facer pausas e comer.
Máis comprometidos con Vigo
O avance da transformación integral da sede de García Barbón é unha nova mostra do compromiso de ABANCA con Vigo. A finalización das distintas fases do proxecto desenvolvidas ata o momento serven para facer tanxible a conexión do banco non só coa cidade, senón tamén co seu tecido empresarial e cos profesionais que traballan no edificio.
ABANCA segue sendo a entidade financeira de referencia para familias, empresas, autónomos e administracións públicas da cidade e da súa área metropolitana. Conta coa maior capacidade comercial dun banco na área metropolitana, grazas ás súas 81 sucursais e aproximadamente 1.000 profesionais. Unha presenza destacada que lle permite ofrecer un servizo integral que abrangue todos os segmentos da banca minorista, a banca corporativa e a banca especializada, sen esquecer a súa unidade de xestión personalizada a distancia, ABANCA Conecta. Todo isto para dar servizo a uns 320.000 clientes e xestionar un volume de negocio superior aos 17.400 millóns.
A proximidade e o coñecemento da realidade económica desta área ten a súa continuidade tamén nas decenas de acordos de colaboración que o banco mantén vixentes con algúns dos principais axentes que máis decisivamente impactan no tecido produtivo vigués. Un impulso económico que tamen ten a súa continuidade na labor educativa, social e cultural que desenvolve Afundación na cidade, co apoio decidido de ABANCA. E, por suposto, que segue a través da Universidad Intercontinental de la Empresa (UIE), unha institución académica consolidada que conta cunha ampla oferta formativa de programas de grao e posgrao no seu campus da Avenida de Madrid.