ABANCA presenta por primeira vez en Madrid unha selección de obras da súa Colección de Arte

ABANCA presentará o próximo 15 de outubro no Museo Thyssen de Madrid unha selección das máis de 1.300 obras que integran a súa colección de arte, unha das máis importantes de España de carácter privado. O protagonismo absoluto da mostra recae en Pablo Picasso, un dos grandes xenios da arte do século XX, e xunto a el podemos atopar outros sete mestres enmarcados no ámbito e influencia do cubismo e poscubismo.

As 12 obras seleccionadas de Pablo Picasso, Juan Gris, George Braque, Julio González, María Blanchard, Manuel Ángeles Ortiz, Jean Metzinger e Fernand Léger reflicten o que foi este movemento de vangarda internacional e permiten realizar un percorrido por un dos acontecementos pictóricos máis relevantes do século pasado. ‘Picasso e o cubismo na Colección de Arte ABANCA’ poderá visitarse no museo madrileño ata o 13 de decembro.

Unha das mellores coleccións privadas de España

A Colección de Arte ABANCA é un extraordinario patrimonio artístico e cultural que a converte nunha das iniciativas artísticas corporativas máis importante de España. Creada co obxectivo de impulsar o mecenado artístico, reúne tanto a artistas españois como internacionais. A colección está integrada por pinturas, esculturas, fotografías, gravados, debuxos e instalacións de autores galegos como Castelao, Laxeiro, Seoane, Lugrís, Grandío ou Nóvoa, xunto a obras de artistas da talla de Picasso, Leger, Miró, Dalí, Braque, Millares, Chillida, Tapies, Juan Muñoz, Barceló ou Cristina Iglesias, entre outros.