ABANCA súmase á rede de Socios Colaboradores do Real Instituto Elcano
De esquerda a dereita, o conselleiro delegado de ABANCA, Francisco Botas, e o presidente do Real Instituto Elcano, José Juan Ruiz.
Descarga en alta resolución Serás redirixido a outro sitio web e abrirase nunha nova ventá
O Real Instituto Elcano incorporou a ABANCA como novo Socio Colaborador, no marco do seu Programa de Socios Corporativos, fortalecendo así o seu compromiso de traballo conxunto con destacadas empresas nacionais e internacionais na análise dos desafíos globais desde unha perspectiva española.
A formalización da incorporación tivo lugar nun acto celebrado na sede do Instituto en Madrid, coa presenza de Francisco Botas Ratera, conselleiro delegado de ABANCA, e de José Juan Ruiz, presidente do Real Instituto Elcano.
“A base das sociedades é a cooperación. Neste momento de grandes transformacións no taboleiro global, colaboracións como a que hoxe iniciamos con ABANCA son máis que nunca sinónimo de progreso e influencia”, expresou durante a firma o presidente do Real Instituto Elcano, José Juan Ruiz.
Pola súa banda, Francisco Botas Ratera, conselleiro delegado de ABANCA, resaltou que esta alianza co Real Instituto Elcano “é un paso estratéxico relevante nun momento en que a investigación e o dominio da xeopolítica é crucial polo impacto directo que ten na estabilidade, na seguridade e no progreso económico da nosa sociedade”.
Mediante a súa incorporación como Socio Colaborador, ABANCA participará en varios eixos de investigación, grupos de traballo e actividades do Instituto, sumando a súa experiencia e perspectiva en ámbitos clave como os da geoeconomía; a política industrial, regulación e competitividade; e o futuro da Unión Europea. Grazas a esta colaboración, o Instituto continúa desenvolvendo un dos seus obxectivos fundamentais: ofrecer respostas innovadoras, sólidas e inclusivas sobre os desafíos globais e a súa gobernanza, nun escenario internacional de crecente complexidade e incerteza.
ABANCA é un banco español con vocación ibérica. Conta con preto de 900 oficinas en 11 países de Europa e América, máis de 8.000 empregados e un volume de negocio de máis de 134.000 millóns de euros. A súa proposta diferencial combina a atención persoal coa operatoria a través de canles dixitais e a distancia. ABANCA basea a súa actividade no coñecemento das necesidades do cliente e nun catálogo de produtos e servizos sinxelos, innovadores e transparentes. A especialización, a internacionalización e a sostibilidade son outros sinais de identidade dunha entidade financeira situada entre as máis solventes do sector en España. ABANCA conta con rating na categoría A, o bloque de cualificacións máis elevado das axencias.
O Real Instituto Elcano é o think tank líder en español en estudos internacionais e estratéxicos, realizados desde unha perspectiva española, europea e global. O seu obxectivo é fomentar na sociedade o coñecemento da realidade internacional e as relacións exteriores de España, así como servir de foco de pensamento e xeración de ideas para a toma de decisións dos responsables políticos, os dirixentes de empresas privadas e institucións públicas, axentes sociais e a sociedade civil no seu conxunto.