B100, Gravity Wave e Ayúdame3D alíanse para producir próteses a partir de redes de pesca recicladas

18-11-2025

Un proxecto de investigación financiado por B100, a marca de banca dixital de ABANCA, e desenvolvido por Ayúdame3D e Gravity Wave conseguiu tras meses de intenso traballo producir próteses a partir de redes de pesca recicladas, un fito que abre unha nova vía de reutilización para este tipo de residuos plásticos.

“É un proxecto inspirador no que tres compañías con propósito, Ayúdame 3D, Gravity Wave e B100, conseguimos abrir un novo abanico de posibilidades para revalorizar este tipo de plástico, e fixémolo ademais co obxectivo de axudar desinteresadamente a persoas de diferentes países do mundo”, explicou Jorge Mahía, director executivo de B100, na rolda de prensa de presentación do proxecto, na que estivo acompañado por Guillermo Gauna-Vivas, fundador de Ayúdame3D, e por Julen Rodríguez, co fundador de Gravity Wave.

Segundo o explicado no acto, o proceso arrinca cun xesto habitual: cada vez que un cliente de B100 paga cunha tarxeta de débito ou crédito Visa Pay to Save, B100 destina unha cantidade para loitar contra a contaminación marítima con Gravity Wave. “Renunciamos a un 25% dos ingresos que xeran as nosas tarxetas precisamente para poder facer este tipo de proxectos, ese é o verdadeiro propósito de B100: coidar da saúde financeira e tamén da saúde física e mental dos nosos clientes, e da saúde do planeta”, ampliou Jorge Mahía.

Gravity Wave é unha empresa alacantina que traballa con pescadores e compañías como B100 para retirar plásticos do mar e portos, dándolles unha segunda vida en forma de diferentes produtos. Esta empresa de impacto social, en cuxas oficinas en Patio, o hub de innovación madrileño, celebrouse a rolda de prensa, encargouse ademais de manipular esas redes (clasificalas, limpalas, triturarlas… ) ata convertelas en pellets aptos para o seu uso industrial.

“Ata hoxe o uso principal era para facer taboleiros e planchas de plástico reciclado, pero nunca ata o de agora puidemos chegar ao detalle que conseguiu Ayúdame3D”, sinalou Julen Rodríguez, un dos impulsores de Gravity Wave. B100 asumiu a adquisición das máquinas necesarias para esta fase da investigación, que desenvolveu o equipo de enxeñeiros de Ayúdame3D. Contouno Guillermo Gauna-Vivas, fundador de Ayúdame3D: “Necesitabamos unha trituradora de reciclaxe e unha filamentadora que transformasen estas redes en material adecuado para impresoras 3D. Sen esta infraestrutura non sería posible conseguir o que conseguimos“.

Con esta técnica producíronse xa diferentes aparellos protésicos para axudar a persoas con dificultades motoras nas súas tarefas do día a día, así como diferentes pezas que se integran en próteses máis complexas. “É a primeira vez que se utiliza plástico desta orixe para este fin, a nivel mundial, así que estamos moi contentos porque foi un éxito dunha empresa española, de enxeñeiros españois… para problemas que afectan a toda a humanidade”, explicaba Gauna-Vivas.

Próximos pasos

Ademais de próteses desenvolvidas enteiramente con este material, as empresas implicadas investigan tamén outros usos integrando este plástico con outro tipo de derivados do petróleo reciclados. “Temos moitas ideas sobre a mesa, e cremos que temos por diante uns anos moi interesantes: porque nos queda todo por facer para darlle unha nova vida ao plástico que recollemos do mar coas nosas tarxetas“, comentou Jorge Mahía.

Sobre Ayúdame3D

Ayúdame3D é unha entidade social española que utiliza a tecnoloxía de impresión 3D para crear e entregar gratuitamente próteses e dispositivos de axuda a persoas con discapacidade ou en situación de vulnerabilidade en todo o mundo. O seu principal produto son as "Trésdesis", próteses de brazo e man impresas en 3D, deseñadas para mellorar a calidade de vida, reducir a desigualdade e fomentar a inclusión social, educativa e laboral dos seus beneficiarios en máis de 70 países. A organización fusiona a innovación tecnolóxica coa empatía e un forte valor social, promovendo a Responsabilidade Social Tecnolóxica e un modelo de colaboración global con particulares, empresas e unha rede de voluntarios con impresoras 3D. Demostran que a tecnoloxía accesible pode ser unha poderosa ferramenta para transformar vidas e construír un futuro máis xusto e equitativo.

Sobre Gravity Wave

Gravity Wave é unha empresa de impacto social e ambiental dedicada a combater a contaminación plástica en mares e océanos, con especial foco no Mediterráneo. O seu modelo, baseado na economía circular e a colaboración con comunidades locais, involucra a máis de 7.000 pescadores tradicionais que recollen residuos plásticos en portos e durante as súas faenas, especialmente redes de pesca descartadas.

O plástico recolleito clasifícase, recíclase e transfórmase en materiais e produtos de valor para distintas industrias, pechando así o ciclo de vida do material e reducindo a dependencia do plástico virxe. Gravity Wave fundaméntase nun impacto ambiental tanxible, a colaboración local e a transformación de residuos en recursos útiles, e colabora con máis de 250 marcas para impulsar unha economía circular que rexenera os océanos. Ata a data, recuperou máis de 1.200.000 kg de residuos de mares e portos, e continúa intensificando os seus esforzos para ampliar o seu impacto.

Sobre B100

B100 é unha marca de banca dixital de ABANCA, unha das principais entidades financeiras españolas. Esta proposta, 100% dixital, puxo con éxito no mercado o seu modelo de Healthy Banking, que integra a xestión financeira con incentivos para un estilo de vida saudable e o coidado do medioambiente, recompensando aos clientes por manter hábitos diarios enfocados no coidado da saúde.

A nova funcionalidade Move to Save permite mover diñeiro da conta principal a unha remunerada sempre que o cliente cumprise o obxectivo de pasos que se marcou. Do mesmo xeito, a funcionalidade Off to Save expón o reto de fixar un tempo máximo diario de acceso en redes sociais para transferir diñeiro á conta remunerada e incentivar a desconexión dixital. No relativo ao medioambiente, B100 destina un 25% do que ingresa con cada pago coas súas tarxetas Visa Pay to Save que realiza un cliente coa súa tarxeta de débito a un proxecto de recollida de plásticos contaminantes no mar.