B100 lanza “Block Friday”, unha acción a favor do consumo responsable

20-11-2025

B100 The Healthy Banking, a marca de banca dixital de ABANCA, lanzou unha campaña durante este mes de novembro para promover as compras responsables en Black Friday, un dos períodos de maior consumo do ano.

Baixo o lema “Block Friday”, a entidade comprou e bloqueou espazos publicitarios no epicentro comercial de Madrid para convidar á reflexión antes de comprar, nunhas datas nas que segundo diferentes estudos máis do 60% das compras son impulsivas.

“Non se trata de non comprar: trátase de comprar ben e de recoñecer que moitas veces a mellor forma de aforrar é consumir con responsabilidade e consciencia", sinalou Jorge Mahía, director executivo de B100.

Con publicidade exterior nas zonas máis comerciais do centro de Madrid e cunha campaña dixital en multitude de formatos, B100 repintou de negro espazos destinados á promoción coa mensaxe “pensa, pensa, pensa, compra”.

Diferentes enquisas achegan información científica sobre o comportamento dos consumidores ante esta saturación publicitaria: máis do 60 % das compras realizadas durante o Black Friday responden a decisións impulsivas, e un 39 % dos compradores admite arrepentirse despois de adquirir produtos que non necesitaba.

O que comezou como unha tradición estadounidense tras o Día de Acción de Grazas contaxiouse mundialmente como unha nova tempada de consumo desbordado. Ante esta realidade, B100 decidiu apostar por unha acción simbólica que fomente o consumo consciente.

B100, o actor máis novo no mercado da banca dixital española, posicionou a súa marca cun discurso innovador ao redor da saúde non só financeira, senón tamén física e emocional (con produtos de aforro vinculados ao deporte e a desconexión dixital) e ambiental (os seus clientes limpan plástico do mar cada vez que pagan con tarxeta, grazas a que o banco renuncia a unha parte dos seus ingresos para este fin).

Con esta iniciativa, B100 reforza o seu compromiso cun modelo de banca responsable que vai máis aló dos produtos financeiros, buscando xerar un impacto positivo tanto na saúde económica das persoas como na mentalidade colectiva fronte ao consumo.

Sobre B100

B100 é unha marca de banca dixital de ABANCA, unha das principais entidades financeiras españolas. Esta proposta, 100% dixital, puxo con éxito no mercado o seu modelo de Healthy Banking, que integra a xestión financeira con incentivos para un estilo de vida saudable e o coidado do medioambiente, recompensando aos clientes por manter hábitos diarios enfocados no coidado da saúde física e mental.

A nova funcionalidade Move to Save permite mover diñeiro da conta principal a unha remunerada sempre que o cliente cumprise o obxectivo de pasos que se marcou. Do mesmo xeito, a funcionalidade Off to Save expón o reto de fixar un tempo máximo diario de uso de redes sociais para transferir diñeiro á conta remunerada e incentivar a desconexión dixital. No relativo ao medioambiente, B100 destina un 25% do que ingresa con cada pago que realiza un cliente coas súas tarxetas de débito e crédito a un proxecto de recollida de plásticos contaminantes no mar.