B100, novo patrocinador principal da Cursa dels Nassos de Barcelona

B100. The Healthy Banking dará nome á Cursa dels Nassos que se disputará o 31 de decembro.
En breve abriranse as inscricións, con máis de 13.000 dorsais dispoñibles, 1.000 máis que o récord da edición anterior.

29-07-2025

B100 The Healthy Banking, a marca de banca dixital de ABANCA, unha das principais entidades financeiras españolas, patrocinará e dará nome á Cursa dels Nassos de Barcelona, que se celebrará o vindeiro 31 de decembro.

A B100 Cursa dels Nassos, unha cita ineludible no calendario deportivo nacional e internacional, cos seus 4 récords do mundo nas últimas 4 edicións, prevé bater de novo nesta edición un récord de participación, con máis de 13.000 inscritos procedentes de máis de 55 países.

“Estamos moi orgullosos de dar un paso máis na nosa colaboración co mundo do deporte participando nesta cita imprescindible no calendario de fin de ano”, asegurou Jorge Mahía, director executivo de B100.

Desde a dirección executiva da proba, Bea Caballero, directora de La Sansi, transmitiu: “Estamos moi contentos de ter a B100 como patrocinador principal, ao ser unha marca que aposta polos mesmos valores que representa a carreira: deporte, saúde mental, sostibilidade e compromiso coas persoas”.

Con esta alianza, a B100 Cursa dels Nassos reforza o seu compromiso co benestar e o deporte como motor de transformación persoal e social. As inscricións da B100 Cursa dels Nassos de Barcelona abriranse o vindeiro mércores 30 de xullo en www.cursadenassos.barcelona

B100 The Healthy Banking

Lanzado hai pouco máis dun ano, o neobanco de ABANCA tense posicionado como unha das entidades financeiras máis innovadoras do mercado. B100 propón unha oferta financeira moi competitiva (ofrece varias contas sen comisións, dúas delas remuneradas, e unha tarxeta deseñada para viaxar que recolle plástico con cada uso), e diferentes servizos que vinculan aforro con saúde física e mental.