CECA premia ABANCA e Afundación na súa convocatoria estatal por dous programas educativos sobre sostibilidade e ciberseguridade
- Educación para a sostibilidade e o programa sobre finanzas dixitais nunha contorna segura «Pon o teu diñeiro a salvo», dirixidos ambos a escolares, son as dúas propostas multidisciplinares premiadas
- Os galardóns entregáronse hoxe en Madrid no transcurso da gala dos Premios CECA
Miguel Ángel Escotet recolleu os dous premios recibidos.
Descarga en alta resolución Serás redirixido a outro sitio web e abrirase nunha nova ventá
Foto de familia de todas as entidades recoñecidas nesta edición dos Premios CECA.
Descarga en alta resolución Serás redirixido a outro sitio web e abrirase nunha nova ventá
A Confederación Española de Caixas de Aforro (CECA) recoñeceu a ABANCA e a súa Obra Social, Afundación, nunha gala de entrega celebrada este mediodía no Real Casino de Madrid. Os premios, que se entregan a nivel nacional, distinguen anualmente o labor daquelas entidades e fundacións que demostraron un alto grao de compromiso coa sociedade e coa contorna. Nesta ocasión, o programa «Educación para a sostibilidade» foi galardoado co primeiro premio na categoría de Medio, e o programa sobre finanzas dixitais e ciberseguridade «Pon o teu diñeiro a salvo» obtivo o primeiro premio na rama de Educación Financeira para nenos e novos.
Con estas distincións recoñécese o compromiso de Afundación e ABANCA coa posta en marcha de proxectos encamiñados a concienciar sobre a importancia das actitudes ambientalmente respectuosas, a formación e a innovación como mecanismos de mellora, e a cohesión e a inclusión como valores esenciais para un progreso social xusto. O director xeral de Responsabilidade Social, Sostibilidade e Comunicación de ABANCA, e presidente de Afundación, Miguel Ángel Escotet, recolleu ambos os galardóns.
Os programas premiados
A partir dunha programación variada, dinámica e innovadora, «Educación para a sostibilidade» proporciona coñecemento para entender os desafíos ambientais e empodera aos máis novos para ser axentes de cambio, reforzando a súa autonomía e responsabilidade no camiño cara a un maior compromiso sostible. A través de moi diversos enfoques, en liña coas diferentes áreas de Afundación, o público escolar ―desde secundaria, ata bacharelato, ciclos formativos e universidade― penetra no coñecemento e na participación activa do coidado do medio.
Así, o programa contempla accións directas de voluntariado na limpeza de areais ou replantación forestal a través do proxecto PLANCTON; actividades didácticas derivadas de exposicións de contido ambiental; iniciativas que combinan prácticas sostibles con expresión artística como «Plantando árbores con pinceis» ou representacións teatrais. Ademais, Afundación conta en Vigo con Naturnova, un centro de educación ambiental, único en Galicia. Todo iso co propósito de concienciar a públicos diversos de toda a xeografía galega sobre a necesidade de manter un firme compromiso sostible. Case 30.000 persoas involucráronse, no que levamos de ano, coa Obra Social ABANCA, na protección das nosas contornas e na formación para seguir avanzando cara a un mundo máis sostible.
O programa de educación financeira «Pon o teu diñeiro a salvo», está dirixido a estudantes de segundo ciclo de ESO, bacharelato e ciclos formativos e ten como obxectivo proporcionarlles formación no ámbito das finanzas dixitais e a ciberseguridade.
Tendo en conta que o último informe PISA revela que un de cada catro adolescentes ten carencias significativas en educación financeira, «Pon o teu diñeiro a salvo» utiliza unha contorna gamificada e inmersiva para que os participantes aprendan divertíndose. Redes sociais, identidade dixital, mensaxes fraudulentas, apps maliciosas, compras en liña e protección do consumidor ou criptomoedas son algunhas das temáticas que se abordan no proxecto no que participaron xa ao redor de 45.000 escolares de 883 centros de toda España.