Educa e ABANCA entregan os VIII Premios EDUCA ABANCA aos mellores docentes de 2024

15-03-2025

A plataforma educativa Educa e a Obra Social ABANCA celebraron esta tarde en Palexco a entrega dos VIII Premios EDUCA ABANCA aos mellores docentes de 2024.

Educa, en colaboración con Afundación, impulsa estes galardóns desde 2017 co propósito de recoñecer e homenaxear o labor dos profesionais da educación, tanto nas distintas etapas do ensino regrado como na educación non formal.

Nesta oitava edición, a cerimonia reuniu a 380 asistentes entre premiados, docentes e un nutrido grupo de representantes institucionais entre os que se atopaban o conselleiro de Educación, Ciencia, Universidades e Formación Profesional da Xunta de Galicia, Román Rodríguez; o subsecretario de Educación, Formación Profesional e Deportes do Ministerio de Educación, Santiago Roura; o director xeral de Responsabilidade Social, Sostibilidade e Comunicación de ABANCA, reitor da Universidad Intercontinental de la Empresa e presidente de Afundación, Miguel Ángel Escotet, e o director xeral da plataforma Educa, Víctor Arufe.

Durante a gala, entregáronse os premios aos sete docentes gañadores nas súas respectivas categorías e outorgouse un recoñecemento especial aos finalistas. En total, 61 profesionais de distintos puntos de España foron distinguidos polo seu compromiso e excelencia no ensino. Noelia Salas Román, profesora no CEIP Pérez de Hita de Lorca (Murcia) recolleu o premio na categoría de Educación Infantil. Ana García Pérez, mestra no CEIP Europa de Linares (Andalucía), foi a gañadora na categoría de Educación Primaria. Marc Lloret Parra, profesor no IES Joan Fuster de Sueca (Comunidad Valenciana), recibiu o galardón no apartado de Educación Secundaria. Juan Carlos González Hernández, docente no CPFP Río Duero de Valladolid (Castilla y León), foi recoñecido na categoría de Formación Profesional. Ana María González Herrera, mestra nos centros OposPills na modalidad online (Andalucía), alzouse co premio na categoría de Educación non formal. Por último, Ingrid Mosquera Gende, profesora na Universidad Internacional de La Rioja de Logroño (La Rioja), obtivo o recoñecemento na categoría de Universidade.

Cada un recibiu unha figura conmemorativa EDUCA, un diploma acreditativo e un premio en metálico.

Como broche final, entregouse a mención honorífica á traxectoria docente a Nieves María Montenegro Guzmán, profesora xubilada que impartiu docencia nas Islas Canarias.

Novena edición dos Premios EDUCA ABANCA

O prazo para presentar candidaturas para a novena edición dos premios, que distinguirán aos profesores que destaquen pola súa boa praxe profesional en 2025, está xa aberto.

Calquera estudante pode propoñer para o galardón ao docente que admire pola súa entrega á profesión e o traballo que realiza a través do formulario dispoñible na web www.plataformaeduca.org. No caso das categorías de Educación Infantil e Primaria serán as familias as que deban realizar as propostas.

Os Premios EDUCA ABANCA teñen como obxectivo mellorar a visibilidade da boa práctica docente entre a sociedade e dar voz ao alumnado e ás súas familias á hora de recoñecer a aqueles profesores que destaquen polo seu bo facer. A iniciativa permite enxalzar a figura do bo docente, a súa implicación no proceso de ensino e tamén a importancia do papel que desenvolven estes profesionais na sociedade.