Fitch mellora un chanzo o rating de ABANCA
- A axencia mellora o rating emisor a longo prazo de ABANCA de BBB- a BBB, con perspectiva estable
- Fitch Ratings basea a súa decisión nas melloras en rendibilidade, calidade de activos e capitalización, así como na execución exitosa das operacións corporativas
- É a terceira mellora de rating recibida polo banco desde novembro de 2024
Descarga en alta resolución Serás redirixido a outro sitio web e abrirase nunha nova ventá
Fitch Ratings mellorou un chanzo o rating emisor a longo prazo de ABANCA, que pasa de BBB- a BBB. Fitch situou a perspectiva de ABANCA en estable.
As melloras estruturais na rendibilidade, calidade de activos e capitalización de ABANCA foron determinantes para esta decisión, que tamén recoñece a exitosa execución das operacións corporativas.
Así mesmo a axencia cualificadora elevou o rating emisor a curto prazo, que pasa de F3 a F2, o rating de viabilidade, que pasa de bbb- a bbb, o rating da débeda senior preferred, de BBB- a BBB, o rating de Tier2, de BB a BB+, e o rating dos instrumentos AT1, de B+ a BB-.
Rendibilidade, calidade de activos e capitalización
Como un dos principais factores, Fitch basea a mellora do rating de ABANCA no posicionamento ibérico da entidade, sumado ao seu perfil financeiro mellorado. A axencia destaca tamén a execución exitosa de operacións corporativas nos últimos anos, a última das cales, EuroBic, espérase completar en 2025. O foco no financiamento a empresas, cunha cota de mercado superior aos seus pares; a calidade dos seus activos, cunha taxa de mora do 2,6%, inferior á media do sector, e con coberturas próximas ao 80%; a rendibilidade estrutural, apoiada entre outros factores no crecemento do negocio e as sinerxias xeradas polas integracións; os adecuados niveis de capitalización; e unha base de depósitos de clientes estable e granular, completada cun adecuado acceso aos mercados maioristas, son outros factores recoñecidos por Fitch na súa decisión.
A subida aplicada por Fitch é a terceira recibida por ABANCA desde o pasado mes novembro, despois das aplicadas por Moody´s e DBRS. Con esta última, recibida neste mesmo mes de febreiro, a entidade alcanzou a categoría de ratings A. ABANCA conta desde abril de 2022 con grao de investimento nos ratings das catro axencias que a cualifican: DBRS, Moody´s, Fitch e Standard and Poor´s.