Nace ABANCA Energy para apoiar a empresas e familias no proceso de transición enerxética

01-06-2023

ABANCA creou a unidade ABANCA Energy, co obxectivo de impulsar o desenvolvemento de proxectos enerxéticos por parte de empresas e familias, promovendo o proceso de paulatino abandono das enerxías baseadas nos combustibles fósiles e a súa substitución por novas fontes sostibles. A través de ABANCA Energy, o banco atenderá as necesidades dos clientes que queiran desenvolver proxectos relacionados coas actividades de xeración, distribución, comercialización e consumo de enerxía, tanto en España como no exterior.

“Coa creación de ABANCA Energy avanzamos no noso modelo de banca responsable, sostible, transparente e innovadora, aseguramos a creación de valor, e contribuímos ao desenvolvemento social e á protección ambiental no territorio”, explica Francisco Botas, conselleiro delegado de ABANCA.

Especialización

ABANCA Energy nace como unha unidade baseada no coñecemento especializado. Súmase por tanto a outras, como ABANCA Seguros, ABANCA Mar, ABANCA Agro, ABANCA Innova, ABANCA Privada ou ABANCA Personal, que o banco creou nos últimos anos para impulsar a actividade e dar resposta ás necesidades de sectores e colectivos de clientes con solucións diferenciadas.

A nova unidade é transversal a toda a organización e aglutina a participación de profesionais e equipos de diferentes áreas do banco, liderados pola dirección de Banca Corporativa e Especializada.

A creación de ABANCA Energy pon ao dispor dos clientes do banco un gran volume de coñecemento no campo da enerxía. No ámbito das renovables, ABANCA acumula máis de 20 anos de experiencia na estruturación de financiamento de proxectos e nos últimos tres practicamente duplicou o seu investimento crediticio, ata alcanzar os 1.124 millóns de euros. Por tipo de tecnoloxía, a fotovoltaica e a eólica son as máis representativas. ABANCA mantén unha presenza estable como financiador de referencia no sector, cun investimento anual na contorna dos 300-350 millóns de euros.

ABANCA Energy potenciará o financiamento de proxectos de enerxías fotovoltaica e eólica a través da modalidade de project finance. Ademais, prestará especial atención aos proxectos baseados en novas tecnoloxías como o hidróxeno, a eólica mariña, os sistemas de almacenamento, a reciclaxe de compoñentes, e a repotenciación e hibridación de instalacións. Tamén impulsará o autoconsumo de empresas e particulares a través de financiamento ao consumo.

Banca responsable e sostible

O lanzamento de ABANCA Energy está conectado con dúas liñas de traballo de gran alcance que o banco vén desenvolvendo ao longo dos últimos anos.

Por unha banda, a actividade de ABANCA Energy está estreitamente vinculada ao Plan de Banca Responsable e Sostible 2021-2024 de ABANCA, que, entre outros obxectivos, persegue impulsar un modelo económico e social respectuoso co medio ambiente e, especificamente, mitigar as consecuencias do cambio climático.

No marco desta estratexia, nos últimos meses o banco puxo en marcha iniciativas como a implantación da enerxía renovable en diferentes instalacións na Coruña (Comunidade Enerxética de Pocomaco), a creación do Laboratorio de Innovación Ambiental, coa función de contribuír a reducir a pegada climática da actividade do banco, ou o lanzamento de novos produtos de investimento para apoiar a descarbonización da economía, como o fondo de renovables Dunas Clean Energy I, FCR.

Doutra banda, ABANCA Energy contribuirá ao obxectivo de ABANCA de apoiar a despregadura dos fondos Next Generation EU e facilitar a súa chegada aos seus beneficiarios, tanto empresas como familias.