O futuro da función financeira, a debate no II Foro Financeiro do sector bancario español
- O evento, organizado por True North Partners LLP coa colaboración de ABANCA, reuniu a 13 entidades financeiras españolas e varios bancos portugueses no Porto
De esquerda a dereita, Alberto de Francisco, director xeral de Finanzas de ABANCA; Francisco Botas, CEO de ABANCA; Lutz Baumgarten, chairman e socio de True North Partners; e Borja Sánchez, director xeral de True North Partners en España.
Descarga en alta resolución Serás redirixido a outro sitio web e abrirase nunha nova ventá
Asistentes ao II Foro Financeiro da banca española.
Descarga en alta resolución Serás redirixido a outro sitio web e abrirase nunha nova ventá
ABANCA foi o anfitrión do II Foro Financeiro da banca española, encontro do sector financeiro español celebrado hoxe no Porto. A xornada, organizada por True North Partners LLP, reuniu a expertos e directivos de 13 entidades financeiras españolas e de varios bancos portugueses para debater sobre o futuro da función financeira, os novos riscos da actual contorna e a xestión do binomio rendibilidade/risco das operacións.
Francisco Botas, CEO de ABANCA, e Lutz Baumgarten, chairman e socio de True North Partners LLP, inauguraron o evento, destacando a importancia para o sector de contar con espazos onde as entidades poidan compartir a súa visión sobre desafíos tan relevantes como a dixitalización, a xeopolítica ou a ciberseguridade.
"Afrontamos un escenario complexo que afecta á nosa actividade e a todas as funcións da nosa xestión. En especial á figura do CFO, unha figura clave nas nosas organizacións e que o será aínda máis nos próximos anos por efecto da transformación tecnolóxica, a regulación e a necesidade de impulsar a cultura da rendibilidade", destacou o CEO de ABANCA, Francisco Botas.
A xornada abriuse coa intervención de Margarita Delgado, anterior subgobernadora do Banco de España, cuxa experiencia e visión achegaron unha perspectiva transversal sobre aspectos relacionados cos modelos de negocio das entidades financeiras europeas.
Mesas de debate
A programación do evento incluíu ademais tres mesas de debate, moderadas por Borja Sánchez, director xeral de True North Partners en España, nas que participaron representantes de diferentes entidades financeiras. As temáticas tratadas foron, respectivamente, a integración de riscos emerxentes, a evolución dos esquemas de medición de rendibilidade, e os retos da transformación da dirección financeira.
"Este ano o debate foi especialmente enriquecedor e innovador con respecto á edición anterior, ao contar cunha contorna tamén distinta, onde o impacto da xeopolítica na xestión de riscos e prezos foi o protagonista, seguido polo impacto da intelixencia artificial aplicada á función financeira", asegurou o director xeral de True North Partners.
Un dos eixos centrais das discusións foi o futuro da función financeira nas entidades. Os participantes analizaron como a dixitalización, a regulación en constante evolución e as novas expectativas dos clientes están a transformar o rol tradicional desta área.
Ademais, debateuse sobre a necesidade de que a función financeira evolucione dun papel meramente transaccional a un máis estratéxico e analítico, impulsando a toma de decisións baseada en datos, a optimización do capital e a xestión proactiva de riscos. A axilidade, a eficiencia e a capacidade de adaptación a contornas cambiantes identificáronse como piares fundamentais para o éxito nos próximos anos.