O voluntariado de ABANCA e Afundación planta 700 árbores en Larouco para restaurar o epicentro do maior incendio de Galicia
- É a sétima actuación ambiental organizada por ambas as entidades no marco do seu Plan de Acción contra os incendios
Descarga en alta resolución Serás redirixido a outro sitio web e abrirase nunha nova ventá
Descarga en alta resolución Serás redirixido a outro sitio web e abrirase nunha nova ventá
Un grupo de 46 persoas voluntarias de ABANCA e Afundación, veciños e veciñas de Larouco e membros da comunidade de montes participaron hoxe nunha nova xornada de reforestación dentro do Plan de Acción contra os incendios do banco e a súa Obra Social, tras a realizada a semana pasada en Quiroga.
Os voluntarios e voluntarias traballaron toda a mañá na plantación de 700 exemplares de especies autóctonas, incluíndo castaños, aciñeiras, sobreiras, abruñeiros, érbedos, pereiras e maceiras silvestres.
A elección de Larouco para esta sétima acción de voluntariado é dun alto valor simbólico e ambiental, xa que este municipio foi o epicentro do incendio forestal máis grave rexistrado na historia de Galicia. O lume, iniciado o 13 de agosto de 2025 na parroquia de Seadur, converteuse nun incendio convectivo de extrema violencia que chegou a calcinar máis de 30.000 hectáreas de monte. As chamas estendéronse tamén polo sur de Ourense ata alcanzar a provincia de Lugo.
A intervención de hoxe ten como obxectivo prioritario recuperar parte da masa forestal perdida, así como contribuír á restauración dos hábitats da fauna local, como o corzo, o xabaril e diversas aves rapaces, que se viron gravemente alterados. Ademais da perda ambiental, o incendio supuxo un duro golpe para a economía local, xa que afectou a montes comunais, explotacións agrícolas e á característica paisaxe vitivinícola da comarca de Valdeorras.
Coa intervención de hoxe, ABANCA e Afundación reforzan o seu compromiso coa rexeneración dos ecosistemas máis afectados polos incendios. Esta actuación súmase ás seis xa realizadas ata o momento: a de reforestación en Quiroga e as cinco organizadas entre outubro e novembro co fin de protexer solos e acuíferos para evitar o arrastre das cinzas cara aos mananciais.
Compromiso coas zonas afectadas
O Plan de Acción contra os incendios deseñado polo banco e executado a través da súa Obra Social vai máis aló da recuperación medioambiental das zonas máis castigadas. O programa integra tamén un amplo paquete de medidas sociais e económicas, entre as que destacan a doazón dun millón de euros para material de vixilancia e prevención. Neste marco, o banco e a súa Obra Social presentaron en decembro os equipos tecnoloxicamente avanzados que proporcionarán á Xunta de Galicia para reforzar o sistema de vixilancia antiincendios.
O banco tamén activou desde o primeiro momento liñas de financiamento específicas dotadas con 150 millóns de euros para axudar ás familias e empresas damnificadas e está a traballar no desenvolvemento de programas de formación e investigación orientadas a mellorar a xestión forestal e a prevención de futuros desastres ambientais.