O voluntariado de ABANCA e Afundación traballa na protección dos chans queimados na contorna de Las Médulas
- A actividade forma parte do Plan de Acción contra os Incendios promovido polo banco e a súa Obra Social para prestar apoio ás zonas e comunidades afectadas polos incendios do pasado verán
Grupo de persoas voluntarias que participaron na actividade organizada por ABANCA e Afundación na contorna de Las Médulas.
Descarga en alta resolución Serás redirixido a outro sitio web e abrirase nunha nova ventá
Persoas voluntarias de ABANCA e Afundación transportan palla para realizar tarefas de mulching en Las Médulas.
Descarga en alta resolución Serás redirixido a outro sitio web e abrirase nunha nova ventá
Persoas voluntarias esparcen palla para protexer os chans afectados polos incendios.
Descarga en alta resolución Serás redirixido a outro sitio web e abrirase nunha nova ventá
Máis de 55 persoas convocadas por ABANCA e Afundación participaron este sábado na primeira acción de voluntariado ambiental organizada en León polo banco e a súa Obra Social no marco do seu Plan de Acción contra os incendios. A iniciativa desenvolveuse na contorna de Las Médulas, no municipio leonés de Carucedo.
O continxente de voluntarios e voluntarias dedicou os seus esforzos á protección dos chans queimados, realizando labores de mulching ou acolchado con palla na contorna de varias das pequenas lagoas, como o Lago Sonido ou a Laguna Larga, co obxectivo de evitar que as cinzas cheguen ata elas.
Estes lugares teñen especial interese desde o punto de vista ambiental debido á presenza de especies endémicas de flora e fauna, como o nenúfar branco (Nymphaea alba), que conta neste lugar coa única poboación coñecida a nivel provincial, ou o galápago europeo (Emys orbicularis), unha especie catalogada como “Vulnerable” dentro do Catálogo Español de Especies Ameazadas. As persoas voluntarias tamén realizaron tarefas de alimentación de fauna.
A actividade contou coa colaboración da Junta de Castilla y León a través do persoal do Monumento Natural Las Médulas.
É a cuarta actuación de recuperación ambiental que organiza o banco dentro do seu Plan de Acción contra os incendios, tras as realizadas nas últimas semanas en Galicia, na contorna de Manzaneda e o Parque Natural do Invernadeiro, nas que participaron máis de 200 persoas.
Apoio financeiro e material de prevención
O Plan de Acción contra os incendios de ABANCA inclúe tamén un amplo conxunto de medidas de apoio financeiro. Entre elas, unha liña de financiamento de 150 millóns de euros destinada a familias e empresas afectadas, co obxectivo de rehabilitar vivendas, repoñer maquinaria agrícola e promover a recuperación dos sectores agrícola, o forestal, o gandeiro e o vitivinícola, os máis prexudicados sen dúbida pola catástrofe.
Ademais, o plan contempla o adianto de indemnizacións de seguros e axudas públicas, así como a concesión de anticipos das axudas da PAC cun tipo de interese do 0%.
Paralelamente, destinarase un millón de euros á adquisición de materiais de prevención e atención, como drons de vixilancia e kits de emerxencia destinados aos concellos.