O voluntariado de ABANCA e Afundación traballa para protexer solos e captacións de auga afectadas polos lumes en Vilamartín de Valdeorras

22-11-2025

Un grupo de 45 persoas voluntarias, convocadas por ABANCA e Afundación no marco do seu Plan de Acción contra os Incendios, prestaron a súa colaboración ao longo de toda a mañá deste sábado nos traballos de protección dos solos e captacións de auga afectadas pola vaga de lumes do pasado verán no Concello de Vilamartín de Valdeorras, un dos máis afectados pola catástrofe ambiental dentro da comunidade, con máis do 90% da súa superficie forestal arrasada polas lapas.

Ao longo da mañá, a veciñanza e as persoas voluntarias chegadas de diferentes puntos de Galicia, desprazáronse ata o lugar de Abelaído, dentro da parroquia de San Vicente, onde centraron os seus esforzos en realizar traballos de mulching ou acolchado con palla en zonas de forte pendente. Estas tarefas teñen un dobre obxectivo. Por un lado, protexer o solo fronte á erosión provocada polas chuvias e as escorrentías, favorececendo ademais a súa rexeneración. Por outro, contribuír á protección dunha das captacións de auga do concello, reducindo na medida do posible a chegada á mesma de lodos e cinzas disoltas na auga que impidan o seu uso para o abastecemento da poboación como auga potable, en concreto ás xentes de Valdegodos e da parroquia de Arcos.

A actividade contou coa colaboración do Concello de Vilamartín e da Xunta de Galicia.

A de hoxe foi a quinta acción de voluntariado organizada por ABANCA e Afundación no marco do seu Plan de Acción contra os Incendios, tras as recentes actuacións levadas a cabo no Monumento Natural Las Médulas na provincia de León, e as desenvolvidas o pasado mes de outubro no Concello de Manzaneda e na contorna do Parque Natural do Invernadeiro, nos concellos de Vilariño de Conxo e Pobra de Trives, nas que participaron máis de 250 persoas voluntarias.

Plan de Acción contra os Incendios

Xunto con este tipo de actuacións de índole ambiental, o Plan de Acción contra os incendios de ABANCA inclúe outra serie de medidas de tipo social e económico, entre as que se atopan a doazón dun millón de euros para a adquisición de material de vixilancia e prevención contra os lumes, unha liña de financiamento dotada con 150 millóns de euros destinada a axudar ás persoas e empresas afectadas, así como a axilización do cobro das indemnizacións de seguros e axudas públicas, ademais da posta en marcha de programas de formación e investigación focalizadas na prevención deste tipo de desastres e na xestión forestal.