RESULTADOS 3T 2024: ABANCA gaña 988 millóns de euros, cunha rendibilidade recorrente do 16,9%

30-10-2024

ABANCA obtivo nos nove primeiros meses de 2024 un beneficio atribuído de 988,1 millóns de euros, cunha rendibilidade ROTE recorrente do 16,9%. Estes sólidos resultados están fundamentados nun crecemento eficiente do negocio, que supera os 127.000 millóns de euros, e na boa xestión do balance.

A entidade consolídase como un dos competidores máis sólidos no mercado ibérico tras a adquisición de EuroBic, que achega un negocio rendible e saneado de máis de 12.000 millóns de euros.

Ademais da súa alta rendibilidade e dinamismo comercial, ABANCA presenta uns robustos niveis de capitalización (CET1 do 12,8% e exceso de capital total sobre requisitos de 1.557 millóns de euros), máxima calidade de activos (cociente de morosidade do 2,6%, cobertura de dubidosos do 78,1% e cociente Texas do 26,9%), e unha cómoda posición de liquidez (cociente LTD minorista do 79,9% e activos líquidos por importe de 24.560 millóns de euros).

A entidade logra un intenso crecemento do negocio en todas as áreas xeográficas e suma máis de 101.000 novos clientes no ano. As novas formalizacións de crédito de particulares e empresas crecen desde setembro de 2023 un 12,1% e un 12,7% respectivamente, os depósitos aumentan un 22,0%, e as subscricións netas en España de fondos de investimento triplícanse, alcanzando unha cota do 4,5%.

Tras o peche da compravenda de EuroBic en xullo pasado, implementáronse melloras relevantes en materia de negocio, gobernanza, imaxe corporativa e proceso de integración. Este impulso reflíctese na evolución comercial do trimestre, con máis de 5.000 novos clientes e 850 millóns en recursos captados.

O banco segue avanzando na súa estratexia de sostibilidade con novas accións no trimestre, entre as que destacan as dirixidas á conservación e a mellora ambiental, á redución de emisións, á educación financeira dos colectivos prioritarios, ao aprovisionamento sostible e á descarbonización da carteira de crédito.

Resultados de alta calidade

O resultado obtido por ABANCA ata setembro, cun beneficio atribuído de 988,1 millóns de euros e un ROTE recorrente do 16,9%, apóiase na boa evolución do negocio con clientes, que se traduce nun incremento do 32,7% da marxe básica en termos anuais. A marxe de intereses creceu un 38,7% interanual (31,3% sen EuroBic), mentres que os ingresos por prestación de servizos fixérono nun 9,1% (4,5% sen EuroBic).

Esta obtención crecente de ingresos recorrentes e diversificados, núcleo do modelo do banco, impulsa a eficiencia, que mellora 3,8 p.p. nun ano e sitúase claramente por baixo do 50% a pesar de manter o investimento en capacidades. A variación dos gastos está condicionada polas integracións e o esforzo realizado para potenciar o negocio, reforzar a protección fronte a ciberriscos, incrementar as capacidades de servizo e mellorar a retribución do persoal.

Todo iso combínase coa aplicación dunha política de estrita prudencia na xestión dos riscos, a pesar dos xa sólidos niveis de morosidade e cobertura. O custo do risco mantense controlado no 0,27%, o cociente de morosidade sitúase no 2,6%, e a cobertura alcanza o 78,1%.

Foco en familias e empresas

Coa incorporación de EuroBic ao grupo, o volume de negocio xestionado por ABANCA alcanza os 127.142 millóns de euros, cifra que supón un incremento interanual do 19,4%.

O crédito á clientela está situado en 49.450 millóns de euros. A carteira en situación normal creceu un 15,7% en termos interanuais (2,9% sen EuroBic), ata os 49.055 millóns. Por tipo de cliente, as empresas e os particulares, colectivos prioritarios do banco, reciben o 86% do total.

Os recursos xestionados de clientes creceron un 21,5% (10,1% sen EuroBic) en termos interanuais, ata os 77.691 millóns de euros. Sobresaen os produtos fóra de balance, que crecen un 19,6%. A estrutura de recursos de clientes ten como compoñente principal os depósitos, que constitúen o 80% do total, aínda que os recursos fóra de balance alcanzan xa o 20% grazas á senda de continuado crecemento.

Os depósitos minoristas aumentaron un 22,0% (7,8% sen EuroBic), ata os 61.913 millóns de euros. O 93% do total de depósitos da entidade corresponde a familias e empresas. Outra característica destacada é a súa alta granularidade: o 69% dos depósitos ten un saldo inferior aos 100.000 euros.

A captación de recursos fóra de balance e a actividade de venda de seguros manteñen, como en trimestres pasados, o seu dinamismo. O fóra de balance creceu un 19,6% interanual (18,8% sen EuroBic), ata os 15.779 millóns de euros. Os ingresos por prestación de servizos vinculados a estes produtos creceron un 17,1%.

As primas de seguros xerais e vida risco creceron un 14,6% interanual, ata os 548 millóns de euros. As primas de seguros de decesos creceron un 91%, as de saúde un 42%, as de empresas un 17% e as de autos un 14%. Os ingresos por prestación de servizos vinculados a estes produtos creceron un 13,4%.

Fortaleza do perfil financeiro

ABANCA mantén a solidez do seu perfil financeiro cunha taxa de morosidade situada no 2,6%, por baixo do sistema, e unha taxa de cobertura destes activos do 78,1%, o que supón 809 p.b. por encima da media.

En termos de solvencia, a elevada rendibilidade recorrente e a prudente xestión de capital impulsan unha senda de mellora continua neste apartado. Isto permitiu á entidade non modificar o seu nivel de solvencia obxectivo, establecido no 13%, a pesar das adquisicións de TARGOBANK e EuroBic.

Así, o cociente de capital de máxima calidade CET1 sitúase no 12,8%, na contorna do 13% establecido a nivel estratéxico. Pola súa banda, o cociente de capital total alcanza o 16,6%, cun colchón sobre requirimentos regulatorios de 413 p.b. equivalente a 1.557 millóns de euros. A entidade cumpre o requirimento MREL fixado para 2024.

Polo que respecta á situación de liquidez, ABANCA dispón de 24.560 millóns de euros en activos líquidos, cifra equivalente a 5 veces os seus vencementos previstos de emisións. Adicionalmente, dispón dunha capacidade de emisión de cédulas de 6.007 millóns de euros, o que sitúa a súa posición total en 30.567 millóns de euros. A súa estrutura de financiamento é fundamentalmente minorista, cun cociente LTD minorista do 79,9%. A entidade presenta cocientes de liquidez do 145% en financiamento neto estable (NSFR) e do 239% en cobertura de liquidez (LCR).

Banca responsable e sostible

ABANCA continúa desenvolvendo o seu Plan de Banca Responsable e Sostible 2021-2024, que encara a súa última fase con especial foco en apoiar aos seus clientes para unha transición cara a un modelo produtivo máis sostible.

Destaca neste sentido a posta en marcha do Plan de acción ABANCA Sostible, acompañando a 14.800 clientes pemes/empresas para brindarlles diagnóstico e asesoramento en materia ESG.

Tamén cabe resaltar que ABANCA acelerou a senda de descarbonización da súa carteira de crédito, ampliándoa a un total de nove sectores, tres dos cales xa se atopan por baixo dos escenarios definidos no Net Zero Emissions para 2030.

No capítulo de redución de CO2, as emisións evitadas alcanzan as 4.487,72 tn a través do uso de enerxía 100% renovable con garantía de orixe, ao que hai que sumar outras 260.465 tn por financiamento de proxectos de enerxía renovable.

Ao longo do terceiro trimestre tiveron lugar novas accións de conservación do litoral dentro de PLANCTON, programa creado por Afundación, a Obra Social de ABANCA. O programa conseguiu retirar 83.000 kg de lixo mariño e 12.300 kg de especies invasoras, mobilizando 3.300 voluntarios e implicando a máis de 70 entidades (profesionais do mar, asociacións e administración). Tamén no ámbito ambiental, ABANCA segue dando apoio a diversas iniciativas de restauración e xestión forestal sostible, co resultado de 550.000 novas árbores plantadas desde 2020.

No ámbito social, o banco lanzou novas accións de educación financeira para mozos e persoas maiores. En todas as idades ABANCA quere contribuír a que as persoas dispoñan da información máis adecuada para planificar a súa vida económica, así como a dotarlles das habilidades dixitais necesarias para conservar a súa independencia persoal na xestión das súas operacións cotiás.

Polo que respecta ás novas accións en materia de gobernanza, ABANCA colaborou co Programa de Capacitación de Provedores Sostibles do Pacto Mundial da ONU. A entidade promoveu a participación de 65 pemes da súa cadea de aprovisionamento na segunda edición deste programa de formación, que lles permitirá superar algunhas das principais barreiras ás que se enfrontan no proceso de transformación sostible, como a falta de coñecemento, de ferramentas e de recursos formativos. ABANCA viu recoñecida a súa implicación como organización impulsora do programa.