RESULTADOS 3T 2025: ABANCA gaña 670 millóns de euros, cunha rendibilidade do 15,1%

28-10-2025

ABANCA obtivo nos primeiros nove meses do ano un beneficio atribuído de 670,4 millóns de euros, cunha rendibilidade ROTE do 15,1%. O resultado obtido baséase no crecemento eficiente do negocio e a boa xestión do balance.

A entidade elevou o seu volume de negocio por encima dos 134.000 millóns de euros. O seu negocio móstrase robusto nos seus principais mercados, España e Portugal, que continúan ofrecendo boas perspectivas económicas.

As novas formalizacións de crédito crecen un 52,6% interanual en particulares e case se duplican en empresas, o que permite que a cota de formalizacións creza 30 p.b. en España e 114 p.b. en Portugal. Pola súa banda, a captación de recursos de clientes crece un 5,2% interanual (368 millóns de euros só no terceiro trimestre) e a cota de mercado de subscricións de fondos de investimento alcanza o 7% no que vai de ano.

Reforzando o seu posicionamento como entidade de dimensión ibérica, ABANCA mantén un forte ritmo de captación de novos clientes en toda a península. No que vai de ano rexistráronse máis de 118.000 altas de clientes, un 17% máis que hai un ano, das cales o 70% provén de áreas distintas á zona de orixe de ABANCA. Este crecemento viuse acompañado por unha alta calidade do servizo: o 64% dos novos clientes valoran cunha nota de 9 ou máis puntos (sobre 10) a súa relación coa entidade e o índice de prescrición neta crece 4 puntos.

A entidade segue posicionada entre os grupos bancarios máis sólidos do mercado ibérico. Os seus bos fundamentais, con máxima calidade dos activos, robustos niveis de capitalización, folgada liquidez e elevados niveis de rendibilidade, todo iso nunha contorna macroeconómica positiva, teñen o seu reflexo nas positivas cualificacións emitidas polas axencias de rating. A última Moody’s, que mellorou dous chanzos a cualificación alcanzando a categoría A.

Os mercados tamén apoiaron a evolución da entidade cunha exitosa acollida á súa última emisión, realizada no mes de setembro por un importe de 500 millóns de euros. A operación atraeu máis de 290 ordes de investimento de máis de 25 países, cunha sobresubscrición de máis de oito veces o importe emitido, mostra do interese que o nome ABANCA esperta entre os investidores de todo o mundo.

En termos de solvencia, a combinación da sólida capacidade de xeración de resultado e a prudente xestión de dividendos deron lugar a un incremento do cociente CET1 en máis de 50 p.b. no último ano.

No terreo da sostibilidade, a entidade tamén ve recoñecida a súa estratexia por parte das axencias especializadas. O banco puxo en marcha no trimestre diferentes accións para apoiar aos colectivos afectados polos incendios do pasado verán e lanzou unha nova edición do seu Programa de Educación Financeira. Con iso reafirma o seu compromiso co impulso da sostibilidade e o desenvolvemento social da súa contorna.

Sólida capacidade de xeración de resultados

O resultado obtido por ABANCA entre xaneiro e setembro deste ano reflicte novamente a súa capacidade de xeración de resultados de alta calidade de maneira recorrente. A boa evolución do negocio con clientes permitiu un incremento do 1,5% da marxe básica, a parte máis core dos ingresos da entidade.

A obtención de sinerxias e as medidas de eficiencia que a entidade puxo en marcha permiten conter os gastos de explotación, que foron descendendo trimestre a trimestre. O control dos gastos, combinado coa fortaleza dos ingresos recorrentes, permite situar o cociente de eficiencia no 51,4%, cunha mellora de 54 p.b no trimestre.

ABANCA mantén unha estrita política de prudencia na dotación de provisións a pesar dos seus sólidos niveis de cobertura. O custo do risco mantense controlado, nun nivel do 0,20%, cun cociente de morosidade do 2,2% e unha taxa de cobertura do 81,8%.

Crecemento en todos os negocios

O volume de negocio xestionado por ABANCA situouse a peche do terceiro trimestre do ano por encima dos 134.000 millóns de euros, tras un incremento interanual do 5,6%.

O volume de crédito á clientela en situación normal situouse en 52.152 millóns de euros, cun crecemento do 6,3% en termos interanuais. O crédito á clientela está centrado de maneira clara no sector privado, coas empresas, co 45% do total, e os particulares, co 39%, como os seus destinatarios fundamentais.

A captación de recursos de clientes mostrou un comportamento similar: alcanzou un total de 81.758 millóns de euros tras crecer un 5,2% respecto a setembro de 2024. Na estrutura de recursos de clientes do banco, o 77% do total corresponde a saldos á vista e a prazo, mentres que o 23% restante a recursos fóra de balance.

A entrada de novos clientes (máis de 88.000 en España e por encima dos 30.000 en Portugal) traduciuse nun incremento do 1,5% nos depósitos minoristas. A carteira de ABANCA ten un perfil netamente minorista: un 94% dos depósitos corresponde a familias e empresas e un 70% ten un saldo inferior aos 100.000 euros.

A intensidade do crecemento rexistrado en fóra de balance e seguros permite á entidade aumentar a calidade dos seus ingresos. Tras crecer un 20,1% interanual, os recursos fóra de balance alcanzan os 18.945 millóns de euros. Pola súa banda, as primas de seguros xerais e de vida risco aumentaron un 14,6% no mesmo período, ata os 634 millóns de euros, cos produtos de decesos (+44%), vida risco (20%), fogar (13%) e empresas (12%) mostrando as evolucións máis destacadas.

Sólido perfil financeiro

ABANCA segue situada como unha das entidades máis sólidas do mercado ibérico, grazas a uns cocientes de capital CET1 do 13,3% e total do 17,8%. No último ano xerou 500 millóns de euros adicionais de colchón de capital, co que dispón de 2.079 millóns de euros (532 p.b.) sobre requirimentos regulatorios. Cun cociente do 23,0%, supera folgadamente (133 p.b) o requirimento MREL.

Como en trimestres anteriores, ABANCA continúa reducindo o seu cociente de morosidade e mantendo amplos niveis de cobertura. Os saldos dubidosos diminuíron nun 11,1% interanual, co que a morosidade quedou situada no 2,2% (2,2% España e 2,4% Portugal). A taxa de cobertura destes activos creceu ata o 81,8%, 8 p.p. máis que a media do sistema.

En materia de liquidez, ABANCA dispón de 23.016 millóns de euros en activos líquidos, cifra equivalente a 4,8 veces os seus vencementos previstos de emisións. Adicionalmente dispón dunha capacidade de emisión de cédulas de 7.369 millóns de euros, o que eleva a súa posición total ata os 30.385 millóns de euros.

A súa estrutura de financiamento é netamente minorista: 86% de depósitos minoristas e cociente LTD minorista do 83,6%. En liquidez, o banco presenta cocientes do 142% en financiamento neto estable (NSFR) e do 201% en cobertura de liquidez (LCR).

Banca responsable e sostible

As axencias máis relevantes do mercado en temática ESG sitúan a ABANCA na mellor categoría posible, o que apoia o seu modelo de sostibilidade e contribución ao desenvolvemento social da súa contorna.

As dúas principais novidades do terceiro trimestre nesta materia son a posta en marcha do Plan de Acción da entidade para apoiar aos colectivos afectados pola vaga de incendios do pasado verán, así como o lanzamento dunha nova edición do Programa de Educación Financeira, en ambos os casos en colaboración con Afundación, a Obra Social de ABANCA.

O Plan contra os incendios inclúe unha liña de financiamento a empresas e familias por 150 millóns de euros, así como unha doazón adicional de 1 millón de euros para material e outros recursos dirixidos a vixilancia anti-incendios, resposta rápida ante situacións similares, formación de profesionais, axuda ao tecido asociativo, investigación en materia de incendios, e desenvolvemento de accións de voluntariado, que xa comezaron a celebrarse.

A nova edición do Programa de Educación Financeira de ABANCA e Afundación, que se estima chegará a unas 220.000 personas, comezou a súa andaina coa presentación da exposición interactiva ‘Ítaca. Unha viaxe pola educación financeira’, que en 2026 poderá visitarse en diferentes cidades españolas.

Pola súa banda, as novas convocatorias dos programas dixitais Segura-Mente, ‘A tola aventura do aforro’ e ‘Pon o teu diñeiro a salvo’ achegan a educación financeira a estudantes de todas as idades e de calquera centro educativo de España, con temas como o aforro, a planificación, a ciberseguridade, ou a finanzas dixitais, entre outros. Outra acción destacada nesta liña é o programa Young Business Talents, xogo de simulación empresarial no que cada ano participan milleiros de mozos e mozas de toda España.