Un centenar de persoas voluntarias da UIE protexen chans e acuíferos afectados polos incendios en Cabeza de Manzaneda

16-10-2025

Máis dun centenar de persoas voluntarias da comunidade educativa da Universidade Intercontinental da Empresa (UIE) participaron esta mañá nunha xornada de voluntariado ambiental en Cabeza de Manzaneda. A acción, organizada por ABANCA e Afundación, enmárcase dentro do Plan de Acción deseñado pola entidade bancaria para prestar o seu apoio aos colectivos afectados pola vaga de incendios do pasado verán.

O lugar escollido nesta ocasión foron as beiras do Regueiro do Rial, preto da área recreativa A Corgavela, un lugar que sufriu con severidade os efectos dos lumes.

As persoas participantes, organizadas en grupos, dedicaron os seus esforzos a repartir unha boa cantidade de palla polas beiras que flanquean o curso fluvial, utilizando a técnica coñecida como mulching. Desta forma, protéxese o chan da erosión producida tras a perda da cuberta vexetal que provocou o lume. Trátase dunha das principais actuacións a acometer despois dos incendios forestais, sobre todo en lugares con certa pendente nos que o lume actuou con severidade. Outra parte do equipo de mozos voluntarios e voluntarias traballou na colocación de acumulacións de gran de millo e centeo en lugares visibles destinados á alimentación da fauna do lugar.

Tal e como ocorreu o pasado sábado, na primeira das actuacións de voluntariado deste Plan de Acción contra os incendios impulsado por ABANCA e a súa Obra Social, a actividade contou coa colaboración do Concello de Manzaneda e do persoal técnico da Confederación Hidrográfica Miño-Sil durante os labores de planificación previas á realización da actividade, mentres que a palla e o gran empregados durante a xornada foron subministrados pola Xunta de Galicia.

Medidas Plan de Acción

Máis aló deste tipo de actividades de recuperación ambiental a pé de campo, o Plan de Acción de ABANCA contempla outra serie de medidas como a doazón dun millón de euros para a adquisición de material de vixilancia e prevención, unha liña de financiamento de 150 millóns de euros para axudar ás persoas e empresas afectadas polos lumes, o adianto das axudas da PAC a tipo 0% e a axilización do cobro das indemnizacións de seguros e axudas públicas, ademais da posta en marcha de programas de formación e investigación sobre prevención e xestión forestal.