A banca móbil de ABANCA supera o millón de usuarios despois de multiplicar as súas capacidades comerciais

21-01-2021

A banca móbil de ABANCA mantén o seu crecemento e acaba de superar o millón de usuarios coa app instalada. Trátase dunha cifra histórica para este servizo do banco que demostra a rápida adopción dunha canle que xa utilizan seis de cada dez clientes particulares da entidade. Con crecementos sostidos nos últimos anos superiores ao 15% e unha porcentaxe de usuarios recorrentes do 75%, a app tamén é unha das mellor valoradas do sector polos usuarios das tendas oficiais de aplicacións móbiles.

Durante a súa traxectoria no mercado, a aplicación foi incorporando constantemente funcións que responden ás demandas dos usuarios e adaptouse tamén á realidade do sector. Unha evolución que permitiu pasar exclusivamente da consulta de movementos que ofrecían as primeiras versións a un catálogo de opcións moito máis amplo na actualidade. Isto é posible grazas aos recursos que destina o banco á mellora da calidade e funcionalidade dos seus servizos dixitais.

A banca móbil xoga precisamente un papel fundamental no impulso á transformación dixital emprendido por ABANCA, dentro da súa estratexia omnicanal. Máis aló de todo tipo de operacións de carácter transaccional como as consultas de produtos, os envíos de diñeiro, as retiradas de efectivo en caixeiros co móbil ou o pagamento de recibos cunha foto, a app incorpora novas posibilidades comerciais. Entre elas, as máis habituais son a contratación de préstamos, as achegas a plans ou fondos, a xestión de seguros ou os aprazamentos de pagos con tarxeta, entre outros.

Este potencial tecnolóxico contribúe a impulsar o negocio dixital do banco, que xa acapara a través das canles dixitais o 90% das transferencias ou a compra-venda de valores e cifras relevantes e cada vez máis importantes nas achegas a plans de pensións, formalización de préstamos preautorizados ou ampliación do límite das tarxetas de crédito. Todo isto sen esquecer que a aplicación rexistrou o pasado mes ao redor de 20 millóns de conexións e contribuíu en igual medida a aforrar numerosos desprazamentos ás nun contexto marcado polas restricións de movemento e a necesidade de reducir os contactos debido á pandemia.

A app de ABANCA foi tamén a canle elixida ao comezo da pandemia, coa emerxencia sanitaria e a necesidade de restrinxir a mobilidade e o contacto, para enviar documentación e formalizar contratacións a distancia. Este servizo permitiu formalizar préstamos da liña COVID-19 activada polo ICO e solicitar a moratoria financeira, entre outros produtos, para permitir unha operación de contratación habitual completa.

Unha aplicación á cabeza do sector

Dende o seu lanzamento, o servizo de banca móbil da entidade evidenciou a súa capacidade de liderado tecnolóxico no sector financeiro. Creada e desenvolvida pola entidade en Galicia, esta app foi unha das primeiras entre os bancos españois en incorporar a pegada ou o rostro como método de recoñecemento, adoptar os máis altos estándares de seguridade ou obter a certificación Ilunion que garante que a aplicación é totalmente accesible para persoas con discapacidade.

O compromiso de abrir novas canles de relación e ofrecer respostas a medida aos clientes é unha das claves que se esconden detrás das boas críticas que recibe a app. Ademais das enquisas internas onde o servizo é un dos mellor valorados do banco, os usuarios das tendas de aplicacións oficiais de App Store e Google Play sitúan á banca móbil de ABANCA como un dos líderes do sector en puntuación e comentarios positivos. O banco está a traballar en novas funcionalidades que incorporará nos próximos meses, que permitirán responder a algunhas das demandas máis habituais dos clientes e apoiar a dixitalización dos usuarios.