A exposición ‘Dalí y el surrealismo en la Colección ABANCA’ supera as 20.000 visitas no Museo Thyssen
- A mostra estará aberta ao público no museo madrileño, con entrada gratuíta, ata o 27 de xaneiro
O presidente de ABANCA, Juan Carlos Escotet Rodríguez, durante a presentación do proxecto expositivo o pasado mes de novembro.
Máis de 20.000 persoas visitaron no Museo Nacional Thyssen-Bornemisza a exposición Dalí y el surrealismo en la Colección ABANCA desde a súa inauguración o pasado 5 de novembro. Na mostra pódense contemplar 13 obras seleccionadas dos fondos artísticos do banco vinculadas a este movemento artístico imprescindible na historia da arte do século XX.
Entre os autores escollidos para o segundo proxecto artístico que realiza o banco no museo madrileño atópanse nomes de referencia no panorama internacional como Salvador Dalí, Max Ernst, Giorgio de Chirico, Joan Miró, Óscar Domínguez ou Maruja Mallo. Do artista de Figueres expóñense os dous lenzos que forman parte da Colección ABANCA, Roses Sanglantes (1930) e Cour ouest de l’îlle des morts (obession reconstitutive d’après Böcklin) (1934), dúas obras significativas da ampla produción deste creador.
A exposición estará aberta ao público, con entrada gratuíta, ata o próximo 27 de xaneiro, os luns de 12.00 a 16.00 horas e de martes a domingo de 10.00 a 19.00 horas.