ABANCA e Fundación Bancaja inauguran a exposición ‘Compromiso coa arte. De Miró a Barceló’ en Valencia
- A mostra ofrece un percorrido pola arte do século XX e XXI desde as vangardas históricas ata a actualidade
- A proposta inclúe 86 obras das coleccións de ABANCA e Fundación Bancaja coa presenza de 59 artistas nacionais e internacionais
Descarga en alta resolución Serás redirixido a outro sitio web e abrirase nunha nova ventá
A Fundación Bancaja e ABANCA acaban de inaugurar en Valencia a exposición ‘Compromiso coa arte. De Miró a Barceló’, que reúne unha selección dos fondos de arte contemporánea de ambas as dúas institucións, ofrecendo unha mirada retrospectiva á evolución da arte durante os séculos XX e XXI.
No acto de inauguración, o presidente de ABANCA, Juan Carlos Escotet Rodríguez, afirmou que "nas nosas entidades se constata unha visión semellante sobre a responsabilidade que o sector privado mantén cara á sociedade: coincidimos nunha decidida vocación social, somos referentes culturais nos nosos territorios, e compartimos a inquietude polo alcance duradeiro e beneficioso das iniciativas que desenvolvemos".
Rafael Alcón, pola súa banda, destacou que “Valencia está de parabéns ao poder gozar desde hoxe na nosa cidade dunha representación tan exquisita da colección de arte contemporánea de ABANCA, dialogando cos fondos da Fundación Bancaja e cunha proposta que viaxa pola mellor arte do último século”.
Ao evento tamén asistiron o conselleiro delegado de ABANCA, Francisco Botas, e o director xeral de Responsabilidade Social e Comunicación e presidente de Afundación, Miguel Ángel Escotet.
A mostra, comisariada por Fernando Castro Flórez, expón un diálogo entre as coleccións de ABANCA e da Fundación Bancaja nun percorrido que abarca desde as vangardas históricas á pluralidade de formas da pintura contemporánea con obras datadas entre 1913 e 2023.
A exposición enmárcase na colaboración entre as dúas institucións, que levou a mostrar este proxecto na sede de Afundación na Coruña en outubro de 2025 e que se presenta agora na sede da Fundación Bancaja cun renovado conxunto de obras seleccionadas.
O percorrido expositivo está integrado por 86 obras, 48 procedentes da Colección ABANCA e 38 dos fondos da Fundación Bancaja. Nesta lectura de máis dun século de arte están representados 59 artistas, que protagonizaron os diferentes movementos pictóricos do período na arte nacional e internacional.
Pola mañá, na presentación aos medios de comunicación, o director xeral de Responsabilidade Social e Comunicación do banco e presidente de Afundación, Miguel Ángel Escotet, subliñou que “a mostra que presentamos hoxe é moito máis que unha suma de cadros e esculturas; é o reflexo dun compromiso compartido e da visión común que teñen ABANCA e a Fundación Bancaja sobre o papel que a cultura debe desempeñar na nosa sociedade”.
Das vangardas históricas á contemporaneidade
As obras das vangardas presentes van desde unha revisión das dinámicas creativas vangardistas con obras de Picasso, Miró, Kandinsky, Georges Braque, Juan Gris, Paul Klee, Joaquín Torres García, Marc Chagall, Giorgio De Chirico, André Lhote ou Jean Metzinger, ata distintos modos de entender a pintura contemporánea, como nas obras de Manolo Valdés ou Soledad Sevilla.
Na mostra, preséntanse as modulacións da pintura desde creadores fundamentais do informalismo como Antonio Saura, Rafael Canogar, Manolo Millares ou Antoni Tàpies, ata artistas que parten do rigor xeométrico como Eusebio Sempere ou José María Yturralde.
Os cadros abstractos de Sean Scully, José Manuel Broto, Antón Lamazares, José María Sicilia, Miguel Ángel Campano ou Günther Förg, e as formulacións pop e figurativas como as de Equipo Crónica, Luis Gordillo, Darío Villalba, Anzo, Juan Barjola, Juan Navarro Baldeweg ou Miquel Barceló, dan conta da vitalidade da práctica pictórica sen derivas nun desenvolvemento lineal e historicista.
Tamén se inclúe un conxunto de pezas vinculadas á evocación da natureza e o contexto urbano, con obras como as de Miquel Navarro, Cristina Iglesias, Urbano Lugrís ou Julian Opie.
A exposición pode visitarse na sede da Fundación Bancaja en Valencia (Praza Tetuán, 23) do 25 de abril ao 6 de setembro de 2026.