ABANCA e Afundación apoian a promoción e difusión do Xacobeo 2027
- A colaboración inclúe unha achega económica de tres millóns de euros destinada a financiar as iniciativas oficiais da Xunta de Galicia e a organización dunha programación cultural e educativa propia
- A entidade financeira e a súa Obra Social preparan un programa de actividades para estender o espírito e os valores do Camiño de Santiago por Galicia e proxectalos a outros territorios españois
De esquerda a dereita Miguel Ángel Escotet, director xeral de RS e Comunicación de ABANCA e presidente de Afundación; o comisario do Xacobeo 2027, Marcos Gómez Román; o presidente da Xunta de Galicia, Alfonso Rueda; o presidente de ABANCA, Juan Carlos Escotet Rodríguez; e o conselleiro delegado de ABANCA, Francisco Botas.
Descarga en alta resolución Serás redirixido a outro sitio web e abrirase nunha nova ventá
O presidente da Xunta de Galicia, Alfonso Rueda, e o presidente de ABANCA, Juan Carlos Escotet Rodríguez, durante a sinatura do acordo.
Descarga en alta resolución Serás redirixido a outro sitio web e abrirase nunha nova ventá
ABANCA e Afundación patrocinan, con tres millóns de euros, o Ano Santo Xacobeo 2027. A achega xorde dun acordo subscrito con Turismo de Galicia que establece o compromiso do banco e a súa Obra Social coa promoción e difusión deste evento. O apoio de ABANCA e Afundación prolongarase ata que finalice a celebración do Ano Santo, en decembro de 2027.
A colaboración inclúe unha achega destinada a colaborar no financiamento das diferentes iniciativas impulsadas pola Xunta de Galicia con motivo do Xacobeo 2027 e a organización dunha axenda propia de actividades culturais, educativas e de sostibilidade que complementarán a programación oficial e contribuirán a reforzar a proxección do Ano Santo, tanto en Galicia como noutras rexións vinculadas ao Xacobeo.
Programación propia
Afundación encargarase da produción e despregamento dunha variada oferta cultural nas súas sedes principais en Galicia e noutros espazos de ABANCA, como o Centro Obra Social ABANCA en Santiago de Compostela. A programación expositiva porá en valor os fondos das coleccións de arte de ABANCA e a súa Obra Social, reunindo pezas de referentes da arte como Urbano Lugrís, Iván Tovar ou Eduardo Arroyo. Así mesmo, desenvolveranse exhibicións de amplo calado como "A metamorfose de Kafka" ilustrada por Stéphane Levallois ou a mostra "Antonio Mingote. A intelixencia do trazo".
Co obxectivo de proxectar internacionalmente a imaxe de Galicia e difundir a dimensión histórica do Camino fóra do territorio galego, parte destas producións culturais trasladaranse a institucións doutras rexións, entre elas o Museo Lázaro Galdiano, Matadero, Casa América ou o Museo Nacional de Ciencias Naturales.
Entre as iniciativas divulgativas destaca ademais ‘Compostella Expeditio’, unha proposta inmersiva desenvolvida con tecnoloxía virtual para recrear a Compostela medieval e as orixes da tradición xacobea. O acordo inclúe tamén programas educativos como ‘Seguramente. O Camiño cara ás túas metas’, que permitirá a escolares de diferentes etapas aprender a tomar decisións financeiras responsables mediante unha simulación pedagóxica baseada nos diferentes itinerarios do Camiño.
ABANCA e Afundación contribuirán a promover un Xacobeo sostible. Para iso, impulsarán o programa de voluntariado ‘O Camiño que facemos xuntos’, con accións dirixidas á conservación e limpeza da contorna natural, como ‘Un camiño sen pegada’, ou a iniciativa de compromiso ambiental ‘Apadriña unha etapa’.
Compromiso con Galicia
O apoio de ABANCA e Afundación á celebración do Ano Santo Xacobeo 2027 é unha mostra do compromiso do banco e a súa Obra Social con Galicia, e da súa vontade de formar parte activa de todas aquelas iniciativas que contribúan a promover o desenvolvemento da Comunidade Autónoma, tanto no ámbito financeiro como no social e cultural.
O Xacobeo é o acontecemento con maior transcendencia de cantos se celebran en Galicia e ofrece unha excelente oportunidade para xerar riqueza, atraer recursos e proxectar no ámbito internacional a imaxe da Comunidade.