ABANCA e Contemporánea presentan en Santiago a segunda edición da exposición ‘Territorio Contemporánea’

15-10-2026

ABANCA e Contemporánea, Asociación de Galerías de Arte Contemporánea de Galicia, presentaron hoxe en Santiago de Compostela a segunda edición da exposición ‘Territorio Contemporánea’. A proposta enmárcase na programación do festival ABERTO '26 e permite mostrar nun mesmo espazo as creacións dos artistas representados polas galerías participantes, consolidando un proxecto común que conecta a salas e creadores de toda a comunidade galega.

Igual que na súa primeira convocatoria, o proxecto articulado entre a entidade financeira e a asociación galerística estrutúrase en dous bloques expositivos que abordan a creación actual e a súa conexión coa historia da arte recente.

Na primeira parte da mostra, situada na planta baixa do Centro ABANCA Obra Social, exhíbense propostas de nove galerías e nove artistas contemporáneos que exploran liñas temáticas como a paisaxe, a memoria, o corpo, a arquitectura ou o territorio.

Neste espazo dialogan linguaxes que van desde a explosión cromática de Francisco Mendes Moreira (Galería Trinta) ata o branco e negro da fotografía documental de Anna Turbau (Galería Nordés), pasando polas liñas impecables de Héctor Francesch (Galería Moret Art), as xeometrías das instalacións de Román Corbato (Galería Néboa), a nitidez pictórica de Hugo Alonso (Galería Dupla) ou as composicións de Enrico Della Torre (Galería Vilaseco), Juan Adrio (Galería Luisa Pita), Tamara Feijoo (Galería Marisa Marimón) e Gabriel Borba Filho (Galería PM8).

Diálogos coa Colección de Arte ABANCA

O segundo bloque, situado no primeiro andar, propón un cruzamento de miradas e fíos invisibles entre obras procedentes dos artistas destas galerías e pezas emblemáticas da Colección de Arte ABANCA. O percorrido pon de relevo como determinadas inquietudes temáticas, formais e conceptuais mantéñense vixentes a través de distintas xeracións.

Entre as correspondencias que expón a exposición atopamos a reinterpretación do motivo clásico da vanitas e o paso do tempo a través das obras de Xurxo Gómez-Chao (Moret Art) e Antía Moure. Pola súa banda, a materia e os elementos orgánicos como vía de expresión conectan os traballos de Alberto Odériz (Nordés) cos lenzos de Darío Basso. Así mesmo, a mostra establece diálogos visuais entre creadores como Lara Pintos (Galería Dupla) e Rubén Ramos Balsa, Luis Gabú (Galería Luisa Pita) e David Planas, Pedro Proença (Galería Marisa Marimón) e Urbano Lugrís, Carlota Pereiro (Galería Néboa) e Berta Cáccamo, Florentino Díaz (Galería Trinta) e Miguel Ángel Campano ou Iris Schomaker (Galería Vilaseco) e Óscar Domínguez.

Con este proxecto conxunto, a Colección ABANCA reafirma o seu compromiso co tecido cultural e galerístico de Galicia, contribuíndo á vertebración da arte contemporánea no territorio e achegando ao público a riqueza da creación actual.

Horario

A exposición poderá visitarse no Centro ABANCA Obra Social de Santiago de Compostela desde o 15 de outubro ata o 27 de marzo, en horario de luns a sábado, de 16.00 a 20.00 horas. Os domingos e festivos permanecerá pechada.