ABANCA abre mañá a reserva de entradas gratuítas para o concerto de Gustavo Dudamel

13-06-2017

ABANCA habilitará mañá mércores 14 de xuño o teléfono 900 815 415 para que o público interesado poida solicitar as entradas gratuítas que lle permitirán asistir ao concerto que Gustavo Dudamel dirixirá na Praza do Obradoiro o próximo 7 de xullo dentro da nova edición de Palabras para Galicia de ABANCA.

As persoas que o desexen deberán contactar telefonicamente coa entidade a través do número citado e achegar os seus datos persoais para facer a reserva de entradas ata un máximo de dúas por persoa. Será necesario facilitar o número de DNI tanto do que realiza a chamada como do acompañante. As entradas recolleranse na oficina de ABANCA que elixan.

O teléfono estará operativo desde as 10.00 horas ata esgotar as entradas.

Como o aforamento é limitado e o interese polo concerto superou todas as expectativas, ABANCA ofrece ao público que non dispoña de entrada a posibilidade de seguir o evento musical a través de dúas grandes pantallas que se instalarán no Parque da Alameda de Santiago de Compostela.

O mestre Gustavo Dudamel dirixirá nun dos espazos máis emblemáticos de Santiago de Compostela á Orquestra Sinfónica de GaliciaSerás redirixido a outro sitio web interpretando a 9ª Sinfonía de Beethoven, un tema que seleccionou por consideralo unha das grandes creacións da humanidade polos valores universais que transmite. No concerto tamén participarán o Orfeón Donostiarra, a soprano Marta Matheu, a mezzo-soprano Lida Vinyes Curtis, o tenor Marc Salga e o barítono Joan Martín-Royo.

O encontro musical servirá tamén para celebrar o 300 aniversario do nacemento do Banco Etcheverría.