ABANCA acorda a compra do banco EuroBic
- A operación está condicionada a unha due diligence e comunicouse en detalle de forma inmediata ao Banco de Portugal
- Esta adquisición é a quinta operación corporativa de ABANCA desde 2014 e a segunda en Portugal
De esquerda a dereita na imaxe, Juan Carlos Escotet Rodríguez, presidente de ABANCA, Fernando Teixeira dos Santos, presidente de EuroBic, e Francisco Botas, conselleiro delegado de ABANCA.
Descarga en alta resolución Serás redirixido a outro sitio web e abrirase nunha nova ventá
Descarga los contenidos anexos
ABANCA acordou a compra do 95% das accións do banco EuroBic. O Banco de Portugal foi informado en detalle dos termos da operación.
De acordo con datos a decembro de 2019, EuroBic xestiona un volume de negocio de 11.699 millóns de euros, con un volume de crédito de 5.198 millóns de euros e uns depósitos de 6.148 millóns de euros. A súa taxa de morosidade está situada no 6,4%. Nesa data o número de empregados de EuroBic era de 1.482 e o de clientes 266.670, mentras que as súas oficinas suman 184.
ABANCA é un dos principais bancos ibéricos e a entidade financeira líder no noroeste da Península Ibérica. Conta con preto de 800 oficinas repartidas por 11 países de Europa e América e un equipo formado por máis de 6.000 profesionais. Xestiona un volume de negocio de 85.079 millóns, 36.792 millóns en préstamos e 48.286 como recursos de clientes. A mora e a súa cobertura sitúanse no 2,8% e o 57,5%, respectivamente. A entidade pechou o pasado exercicio 2019 cun beneficio neto de 405 millóns de euros e unha rendibilidade (ROE) do 10%.
ABANCA probou con éxito o seu modelo de integración doutras entidades nas operacións corporativas que realizou nos últimos anos. A primeira foi a integración en 2014 do Banco Etcheverría; en 2017 realizouse a compra de Popular Servizos Financeiros; en 2018, ABANCA adquiriu Deutsche Bank PCB, e tamén en 2018 comprou á Caixa Geral de Depósitos o seu banco en España, Banco Caixa Geral. Coa compra de Deutsche Bank PCB, ABANCA ten na actualidade en Portugal 71 puntos de venda, con 500 colaboradores e máis de 80.000 clientes.
O acordo de compra de EuroBic está suxeito, como sucede neste tipo de operacións, a un proceso de due diligence e ás autorizacións das autoridades regulatorias.